جومانە غەلای:كۆمسیۆن و نەزاهە و ناوخۆ لێكۆڵینەوە لە كاندیدەكان دەكەن

PUKMEDIA

جومانە غەلای وتەبێژی کۆمسیۆنی باڵای هەڵبژاردنەکانی عیراق

ئامادەکارییەکانی کۆمسیۆنی باڵای سەربەخۆی هەڵبژاردنەکانی عیراق بۆ ئەنجامدانی هەڵبژاردنی داهاتووی پەرلەمانی کوردستان لە ١٠-٦-٢٠٢٤ بەپێی مەرسومی سەرۆکی هەرێم بەردەوامە، وتەبێژی کۆمسیۆنیش رایدەگەیەنێت:" لەداهاتوویەکی نزیکدا نمونەی کاغەزی دەنگدان ئامادە دەکرێت، هاوکات لەداهاتوویەکی نزیکدا ناوی کاندیدەکان دەنێرین بۆ وەزارەتی ناوخۆی عیراق و دەستەی دەستپاکی عیراق و هەرێم، بەمەبەستی بەدواداچوون و لێکۆڵینەوە لەڕابردوویان".

جومانە غەلای وتەبێژی کۆمسیۆنی باڵای هەڵبژاردنەکانی عیراق بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" لەڕابردوودا کارەکانی کۆمسیۆن زۆر بەباشی بەڕێوەچووە و لێکۆڵینەوەش بۆ کاندیدەکان بەردەوامە، لەداهاتوویەکی نزیکیشدا ناوەکان دەنێرین بۆ وەزارەتی ناوخۆی عیراق و دەستەی دەستپاکی عیراق و هەرێم، بەمەبەستی بەدواداچوون و لێکۆڵینەوە لەڕابردوویان".

" لەئایندەدا نمونەی کاغەزی دەنگدان ئامادە دەکرێت و پاش دڵنیابوونەوە لەڕاستی و دروستی کاغەزەکە لەبارەی ژمارە و ناو و لۆگۆی لایەنەکان، کاغەزەکە چاپدەکرێت و ئامادە دەکرێت بۆ دەنگدان" وتەبێژی کۆمسیۆن وایوت.

بەپێی زانیارییەکانی PUKMEDIA کە لە کۆمسیۆنی باڵای هەڵبژاردنەکانی عیراقەوە دەستیکەوتووە، بۆ هەڵبژاردنی داهاتووی پەرلەمانی کوردستان، کۆمسیۆن هەزار و ٢٦٦ بنکەی دەنگدانی ئامادەکردووە، کە ٦ هەزار و ٥٤٢ وێستگە لەخۆدەگرێت و بۆ هەر وێستگەیەکیش ٤ بۆ ٥ کارمەندی پێویستە، هاوکات تائێستا ٨٨٦ کەس خۆیان بۆ خولی شەشەمی پەرلەمانی کوردستان کاندید کردووە، کە ٢٧٧ کەسیان لەڕەگەزی مێن و ٦٠٩ کەسیشیان لەڕەگەزی نێرن،  پێویستە سەرجەم کاندیدەکانیش لەلایەن ئەنجومەنی کۆمسیارانەوە پەسەند بکرێن. 

PUKMEDIA