سەرۆککۆمار: هاوکاری پتەوکردنی پەیوەندییەکانی نێوان هەرێم و عیراق دەبین

نوسینگەی رۆژنامەوانی سەرۆککۆمار

کۆبوونەوەکەی سەرۆککۆمار

 ئێوارەی ئەمڕۆ 11-5-2024 د.لەتیف جەمال رەشید سەرۆكکۆماری عیراق، لە هەولێر لەگەڵ نێچیرڤان بارزانی سەرۆکی هەرێمی کوردستان کۆبووەوە.

لە دیدارێکدا، کە جێگرانی سەرۆکی هەرێم و ژمارەیەك لە وەزیر و لێپرسراوانی هەرێم ئامادەیبون، بارودۆخی گشتی وڵات و پێشهاتەکانی سەر گۆڕەپانی ئیقلیمی و ناوچەیی تاووتوێکران و جەختکرایەوە لەسەر گرنگی پاراستنی ئاسایش و سەقامگیری و یەکخستنی هەوڵەکان بۆ پارێزگاریکردن لەو ئارامی و پێشکەوتنە ئەرێنیانەی لە وڵاتدا هاتونەتەئاراوە.

هەروەها پەیوەندییەکانی نێوان حکومەتی فیدراڵی و حکومەتی هەرێمی کوردستان تاووتوێکران و گرنگی چەسپاندنی رێککەوتنەکان و چارەسەرکردنی تەواوەتی کێشەکان دوپاتکرایەوە، هاوکات ستایشی ئەو هەنگاوانە کران، کە بونەتەهۆی زیاتر بەرەوپێشبردنی پەیوەندییەکان و هەوڵەکان بۆ کۆتاییهێنان بە پرسە هەڵپەسێردراوەکانی نێوان هەردوولا.

هاوکات سەرۆك کۆمار جەختی لەسەر گرنگی دیالۆگ و وتووێژی بەردەوام کردەوە بۆ زاڵبون بەسەر کێشە و گرفتەکان و دابینکردنی ژیانێکی شایستە بۆ هاووڵاتیان لە هەموو ناوچەکانی وڵات، هەروەها هاوکار دەبێت لە پتەوکردنی پەیوەندییەکانی نێوان حکومەتی فیدراڵی و حکومەتی هەرێمی کوردستان و بە تەواوی چارەسەکردنی پرسی بودجە و شایستە داراییەکانی هەرێم و فەرمانبەران، هاوکات کاردەکات بۆ چارەسەرکردنی گرفتەکانی بەردەم جوتیاران و وەرگرتنی بەرهەمی گەنم لەلایەن حکومەتی عراقەوە.

باسی لەوەشکرد، کە بایەخی تەواو بە بەهێزکردنی پەیوەندییەکانی عێراق و هەرێمی کوردستان دەدات لەگەڵ وڵاتانی دراوسێ و ناوچەکە و جیهان.

لەلایەن خۆیەوە سەرۆکی هەرێمی کوردستان ئاماژەی بە هەوڵە بەردەوامەکان کرد بۆ بەرقەرارکردنی زیاتری ئاسایش و ئارامی، هەروەها بۆ تێپەڕاندنی کێشە و گرفتەکانی نێوان حکومەتی فیدراڵی و حکومەتی هەرێمی کوردستان و هاوکات باسی لە سەردانەکەی ئەمدواییەی کرد بۆ کۆماری ئیسلامی ئێران، کە بەشێوەیەکی ئەرێنی کاریگەری لەسەر پەیوەندییەکانی عێراق و هەرێمی کوردستان لەگەڵ ئێران دەبێت.

PUKMEDIA