ئەنجومەنی نوێنەران خشتەی بودجەی ساڵی 2024ی پەسەندکرد

PUKMEDIA

ئەنجومەنی نوێنەران

ئەنجومەنی نوێنەرانی عیراق لە دانیشتنی ئەمڕۆیدا کە تایبەت بوو بە بودجەی ساڵی 2024ی عیراق، توانی پرۆژەی هەموارکراوی خشتەی بودجە پەسەندبکات، پەرلەمانتارێکی یەکێتیش دەڵێت: "بەپێی یاساکە مووچەی مووچەخۆرانی هەرێم خرایە سەر خشتەکان و لە خەرجی راستەقینەوە گوازراوەتەوە بۆ خەرجی سیادی".

لەخەرجی راستەقینەوە گوازراوەتەوە بۆ خەرجی سیادی

د. بڕیار رەشید ئەندامی ئەنجومەنی نوێنەرانی عیراق لە فراکسیۆنی یەکێتی بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "لەکۆبونەوەکەی ئەنجومەنی نوێنەراندا خشتەی بودجەی ساڵی 2024ی عیراق بە ئامادەبونی 199 پەرلەمانتار پەسەندکرا".

"بەپێی یاساکە مووچەی مووچەخۆرانی هەرێم خرایە سەر خشتەکان و لە خەرجی راستەقینەوە گوازراوەتەوە بۆ خەرجی سیادی، بەمەش کێشەی مووچەخۆرانی هەرێم لەگەڵ ململانێ سیاسییەکان جیاکرایەوە"، د. بڕیار رەشید وای وت.

20 ترلیۆن و 910 ملیار دینار وەک پشکی هەرێم دیاریکراوە

د. نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "لە خشتەی بودجەی 2024 دا مافی مووچەخۆرانی هەرێم زامن کراوە، ئەمە جگە لەوەی 20 ترلیۆن و 910 ملیار دینار وەک پشکی هەرێم دیاریکراوە".

"لە پشکی هەرێم زیاتر لە 11 ترلیۆن دینار وەک مووچەی مووچەخۆران دیاریکراوە، ئەمە جگە لەوەی مووچەی مووچەخۆرانی هەرێم خرایە سەر خشتەکان و لە خەرجی راستەقینەوە گوازراوەتەوە بۆ خەرجی سیادی"، د. نەرمین مەعروف وای وت.

پێشتر PUKMEDIA لەزاری پەرلەمانتارێکی یەکێتییەوە بڵاویکردبووەوە کە بۆ پەسەندکردنی خشتەی بودجەی ساڵی 2024 محەمەد شیاع سودانی سەرۆکوەزیرانی عیراق و چوارچێوەی هەماهەنگی هەوڵەکانیان بۆ پەسەندکردنی پرۆژە یاسای بودجە چڕکردۆتەوە، چونکە ناکرێت حکومەت کارەکانی بەهۆی پەسەندنەکردنی بودجەوە رابگرێت.

PUKMEDIA