بەغدا مووچەی مانگی ئایاری بۆ هەرێم نارد

PUKMEDIA

دراوی عیراقی

وەزارەتی دارایی عیراق لەراگەیەنراوێکدا کە وێنەیەکی بۆ PUKMEDIA نێردراوە، ئاماژە بەوەدەکات:"لەئەمڕۆوە ٦-٦-٢٠٢٤پارەی مووچەی مانگی ئایارمان خستەسەر هەژماری وەزارەتی دارایی هەرێم".

بەپێی راگەیەنراوەکەی دارایی عیراق، دەستکراوە بە ناردنی مووچەی هەریەک لە چاودێری کۆمەڵایەتی و فەرمانبەرانی مەدەنی و خانەنشینانی مەدەنی و سەربازی و کەسوکاری شەهیدان و ئەنفالکراوان و سەرجەم چین و توێژە مەدەنییەکانی دیکە.

هێزە ئەمنییەکان لەلیستەکەدا نین

ئەمەش لەکاتێکدایە، زیاتر لە ٦٠ رۆژە بەهۆی ناکۆکییەکانی نێوان حکومەتی هەرێم و دارایی عیراق، لەبارەی لیستی مووچەی هێزە ئەمنییەکان، تا ئێستا بەشێک لە هێزە ئەمنییەکانی هەرێم مووچەی مانگی نیسانیان وەرنەگرتووە.

هاوکات بەپێی راگەیەنراوەکەی دارایی عیراق، بۆ مووچەی مانگی ئایاری مووچەخۆرانیش، جارێکی دیکە هێزە ئەمنییەکان لەلیستەکەدا نین.

دارایی عیراق داوای زانیاری وردتری لیستی مووچەی هێزە ئەمنییەکان دەکات

بەپێی زانیارییەکانی PUKMEDIA دارایی عیراق داوای ناوی سیانی و پلەبەندی و زانیاری وردتری هێزە ئەمنییەکانی هەرێمی کردووە، بەڵام لەلایەن دارایی هەرێمەوە تەنها بەشێوەی کۆد زانیارییەکان نێردراوە، ئەمەش بووەتەهۆی نەناردنی مووچەکانیان.

د. نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "لەگەڵ ئەوەی ماوەیەکە حکومەتی هەرێم لیستی مووچەی هێزە ئەمنییەکانی بۆ دارایی عیراق ناردووە، بەڵام لەلایەن دارایی عیراقەوە داوای زانیاری ورد و زیاتر لەسەر لیستی مووچەی هێزە ئەمنییەکان کراوە، ئەمەش هۆکارێکی دیکەی نەناردنی مووچەی بەشێک لە هێزە ئەمنییەکانە".

PUKMEDIA