پەرلەمانتارێکی یەکێتی لەسەر مووچەی هێزە ئەمنییەکان نامەیەک ئاڕاستەی سودانی دەکات

PUKMEDIA

کاروان یاروەیس

پەرلەمانتارێکی یەکێتی لەسەر مووچەی هێزە ئەمنییەکان نامەیەک ئاڕاستەی سەرۆک وەزیرانی عیراق دەکات و رایدەگەیەنێت: "رۆڵی ماندووی هێزە ئەمنییەکان لەبەرچاوبگیرێت و فەرمان بکەن کە هەرچی زووە مووچەی پێشمەرگە و ئاسایش و هێزەکانی ئاسایش ناوخۆ و پێشمەرگە دێرینەکان و کەمئەندامانی سەنگەر خەرج بکرێت".

کاروان یاروەیس ئەندامی ئەنجومەنی نوێنەرانی عیراق لە فراکسیۆنی یەکێتیی نیشتمانیی کوردستان لە نامەیەکی کراوەیدا کە ئاڕاستەی محەمەد شیاع سودانی سەرۆکوەزیرانی عیراقی دەکات و کە کۆپییەکی بۆ PUKMEDIA ناردووە دەڵێت: "ئەو راستیە ناشاردرێتەوە، کە بەڕێزتان لەچارەسەرکردنی کێشە داراییەکانی نێوان حکومەتی فیدراڵی و هەرێمی کوردستان، رۆڵێکی گەورەتان هەیە، کە دوای زیاتر لە یانزە ساڵ ئاسۆی چارەسەرکردنی ئەم قەیرانە قووڵە بەدەرکەوت، بەڕێز سەرۆک وەزیران، پێشمەرگە و ئاسایش و هێزەکانی ناوخۆ، چەندین ساڵە لەرووبەروبونەوەی زوڵم و ستەمی رژێمی لەناوچوو تا تێکشکاندنی تیرۆر و پاراستنی ئاسایشی وڵاتەکەمان و سەروماڵی هاوڵاتیان قوربانی ئەدەن، بەڵام بەداخەوە بۆ دوو مانگ ئەچێت مووچەیان وەرنەگرتوە، هەر لەناو ئەو لیستانە لیستی مووچەی پێشمەرگە دێرینەکان و کەمئەندامانی سەنگەر هەیە، کە ئەو مرۆڤانەن تەمەن و جەستەی خۆیان بەخشی بە ئازادی بۆ عێراق و کوردستان".

"داوا لەبەڕێزتان دەکەین، وەکو دەسپێشخەری و هەوڵە جدییەکانی ترتان، فەرمان بکەن کە هەرچی زووە مووچەی پێشمەرگە و ئاسایش و هێزەکانی ئاسایش ناوخۆ و پێشمەرگە دێرینەکان و کەمئەندامانی سەنگەر خەرج بکرێ و چارەسەری گونجاویش گەلالە بکرێ بۆ ئەم کێشەیە. کە پێویستە حکومەتی هەرێمیش باشتر هەماهەنگی بکات و بێتەپێشەوە"، کاروان یاروەیس وای وت.

PUKMEDIA