نەرمین مەعروف: پشکی هەرێم لەبودجە 21 ترلیۆنە

PUKMEDIA

د.نەرمین مەعروف ئەندامی لیژنەی دارایی لەئەنجومەنی نوێنەرانی عیراق

ئەندامی لیژنەی دارایی لەئەنجومەنی نوێنەرانی عیراق سەبارەت بە یاسای پەسندکردنی بوودجە رایگەیاند:" نزیکەی ١٠ ساڵی کێشەی دواکەوتنی مووچە هەیە، بەڵام خۆشبەختانە ئەمساڵ توانرا تاڕادەیەکی زۆر کۆتایی بە کێشەی مووچە و ئاستەنگەکانی بهێنرێت، پێدەچێت لەچەند مانگی داهاتووشدا بگەینە چارەسەری ریشەیی".

د.نەرمین مەعروف ئەندامی لیژنەی دارایی لەئەنجومەنی نوێنەرانی عیراق لەکۆنگرەیەکی رۆژنامەوانیدا رایگەیاند:" جاری یەکەمە ٣ ساڵ لەسەر یەک بودجە پەسندبکرێت، کە پشکی هەرێمی کوردستان لەبودجە نزیکەی ٢١ ترلیۆن دینارە، کە ٥ ترلیۆنی بۆ وەبەرهێنان تەرخانکراوە، هاوکات هیچ بڕە پارەیەک بۆ پترۆ دۆلار تەرخان نەکراوە".

لەماوەیەکی نزیکدا بەتەواوی کێشەی مووچە چارەسەر دەکرێت

راشیگەیاند:"بڕی تەرخانکراو بۆ مووچەی مووچەخۆرانی هەرێم ١١ ترلیۆن و ٥٠٠ ملیار دینار دەبێت، کە مانگانە ٩٦٥ ملیار دینار دەکات، واتە ئەم بڕە پارەیە لەئێستادا بەشی مووچەخۆران دەکات بەو مووچەیەی کە هەیانە، بێگومان بەشی ئەو گۆڕانکارییانە ناکات کە پێویستە لەلیستی مووچەی مووچەخۆرانی هەرێمدا بکرێت، بۆ نمونە پلە بەرزکردنەوە، هاوکات نزیکەی ١٠ ساڵی کێشەی دواکەوتنی مووچە هەیە، بەڵام خۆشبەختانە ئەمساڵ توانرا تاڕادەیەکی زۆر کۆتایی بە کێشەی مووچە و ئاستەنگەکانی بهێنرێت، پێدەچێت لەچەند مانگی داهاتووشدا بگەینە چارەسەری ریشەیی".

زانیارییەکان نەگەیشتوونەتە بەغدا

د. نەرمین مەعروف وتیشی:"تا ئێستا زانیاری سەبارەت بە پلە بەرزکردنەوە و یەکەم و دووەم و سێهەمەکانی زانکۆ و ئەو توێژانەی مافی هاوتاکردنی مووچەکانیان هەیە نەگەیشتووەتە بەغدا، هەربۆیە نەتوانرا لە یاسای بودجەدا جێگەی بکرێتەوە، لەهەوڵەکانیشمان بۆ ئەو مەبەستە بەردەوامین و بەڵێنمان وەرگرتووە هەرکاتێک زانیارییەکان گەیشتنە وەزارەتی دارایی عیراق پشتبەست بە یاسای ٦٠ ی یاسای بودجەی ساڵی رابردوو بڕی پارەی پێویست زیاد بکەین".

PUKMEDIA