کێشەی دابەشکردنی مووچەی پێشمەرگە چارەسەرکرا

PUKMEDIA

مووچەی هێزەکانی پێشمەرگە

له‌گه‌ڵ ئه‌وه‌ی وه‌زاره‌تی دارایی ماوه‌ی ٣ رۆژه‌ دابه‌شكردنی مووچه‌ی مانگی نیسانی هێزه‌كانی پێشمه‌رگه‌ی راگه‌یاندووه‌، به‌ڵام به‌هۆی كورتهێنانی مووچه‌وه‌ مووچه‌كانیان پێنه‌درا، به‌ڕ‌ێوه‌به‌ری راگه‌یاندن و هۆشیاری هێزه‌كانی ٧٠ ده‌ڵێت:" كێشه‌كه‌ چاره‌سه‌ركراو ئه‌مڕ‌ۆ ده‌ستبه‌دابه‌شكردنی مووچه‌ ده‌كرێت".

ئەمڕۆ مووچەی هێزەکانی پێشمەرگە دابەشدەکرێت

لیوا ئه‌حمه‌د له‌تیف به‌ڕ‌ێوه‌به‌ری راگه‌یاندن و هۆشیاری هێزه‌كانی ٧٠ به‌سایتی ره‌سمیی یه‌كێتیی نیشتمانیی كوردستان PUKMEDIA ی راگه‌یاند:" كه‌مێك پێش ئێستا كێشه‌ی كورتهێنانی مووچه‌ی هێزه‌كانی پێشمه‌رگه‌ چاره‌سه‌ركراو هه‌ر ئه‌مڕ‌ۆش ده‌ستبه‌دابه‌شكردنی مووچه‌ی مانگی نیسانیان ده‌كرێت".

"نزیكه‌ی ٧٠ رۆژبوو هێزه‌كانی پێشمه‌رگه‌ مووچه‌یان وه‌رنه‌گرتبوو، هه‌روه‌ها ماوه‌ی ٣ رۆژه‌ دارایی لیستی دابه‌شكردنی مووچه‌ی راگه‌یاندبوو، به‌ڵام به‌هۆی كورتهێنانه‌وه‌ مووچه‌كه‌ دابه‌شنه‌كراو دوای هه‌وڵێكی زۆر ئه‌مڕ‌ۆ توانرا كێشه‌كه‌ چاره‌سه‌ربكرێت و ده‌ستبه‌دابه‌شكردنی مووچه‌ بكرێت"، لیوا ئه‌حمه‌د له‌تیف وایوت.

مووچەی هێزەکانی ٧٠ زیاتر لە ٥٠٠ ملیۆن دینار کورتهێنانی هەبووە

به‌پێی به‌دواداچوونێكی PUKMEDIA بۆ مووچه‌ی مانگی نیسانی هێزه‌كانی پێشمه‌رگه‌ زیاتر له‌ 4 ملیار دینار كورتهێنان هه‌بووه‌، به‌ڕ‌ێوه‌به‌ری راگه‌یاندن و هۆشیاری هێزه‌كانی ٧٠ ش ئاماژه‌ بۆ ئه‌وه‌ده‌كات:" له‌و كوتهێنانه‌ش زیاتر له‌ 500 ملیۆن دینار له‌هێزه‌كانمان بووه‌".

هه‌ر له‌و باره‌یه‌وه‌ سه‌رچاوه‌یه‌ك له‌دارایی عیراق به‌ PUKMEDIA ی راگه‌یاند:" نزیكه‌ی هه‌فته‌یه‌كه‌ حكومه‌تی عیراق مووچه‌ی مانگی نیسانی هێزه‌كانی پێشمه‌رگه‌ی به‌ته‌واوی ناردووه‌و هه‌ر كێشه‌یه‌ك هه‌بێت په‌یوه‌ندی به‌حكومه‌تی هه‌رێمه‌وه‌ هه‌یه‌، نه‌ك حكومه‌تی عیراق".

مووچه‌خۆرانی مه‌ده‌نی مووچه‌ی مانگی ئایار وه‌رده‌گرن، به‌ڵام هه‌تا ئه‌مڕ‌ۆ ١٢-٦-٢٠٢٤ هێزه‌كانی پێشمه‌رگه‌ مووچه‌ی مانگی نیسانیان پێنه‌درابوو، ئه‌مه‌ جگه‌ له‌وه‌ی به‌هۆی وردبینی له‌لیستی مووچه‌كانیشیاندا به‌راورد به‌ مووچه‌خۆرانی مه‌ده‌نی نزیكه‌ی ٣٠ رۆژ مووچه‌كانیان دواكه‌وتبوو.

PUKMEDIA