ناکۆکی لایەنەکان هەڵبژاردنی سەرۆکی پەرلەمان زیاتر دوادەخات

PUKMEDIA

ئەنجومەنی نوێنەرانی عیراق

ناکۆکی لایەنەکانی پەرلەمانی عیراق لەبارەی هەڵبژاردنی کەسێک بۆ سەرۆکی نوێی پەرلەمان بەردەوامی هەیە و ئەندامێکی ئەنجومەنی نوێنەرانی عیراقیش رایدەگەیەنێت: "لایەنەکان نەگەشتوونەتە رێککەوتن بۆ هەڵبژاردنی سەرۆکی نوێی پەرلەمانی عیراق و هیچ وادەیەکیش بۆ هەڵبژاردنی سەرۆکێکی نوێ لە ئارادانییە".

هیچ وادەیەک بۆ هەڵبژاردنی سەرۆکێکی نوێ دیارینەکراوە

د. بڕیار رەشید ئەندامی ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "لەگەڵ ئەوەی نەتواندرا لەو وادەیەی پشووی یاسادانانی بۆ درێژکرایەوە سەرۆکی نوێی پەرلەمان هەڵبژێردرێت، هیچ وادەیەکیش بۆ کۆبوونەوە لەبارەی هەڵبژاردنی سەرۆکێکی نوێ نییە".

"لایەنەکان هەتا ئێستا نەگەیشتوونەتە رێککەوتن بۆ دەستنیشانکردنی کەسێکی نوێ بۆ سەرۆکی پەرلەمان، ئەمەش لەکاتێکدایە پەرلەمان هەتا مانگی حەوت لە پشووی یاساداناندا دەبێت"، د. بڕیار رەشید وادەڵێت.

زیاتر له‌ حەوت مانگه‌ ئه‌نجومه‌نی نوێنه‌ران بێ سه‌رۆكه‌

ر‌ۆژی 14-11-2023، دادگای باڵای فیدراڵی عیراق، به‌ تۆمه‌تی (ساخته‌كردنی ئیمزای په‌رله‌مانتار له‌یس دلێمی) ئه‌ندامێتیی محه‌مه‌د حه‌لبووسی، سه‌رۆكی په‌رله‌مانی عیراقی هه‌ڵوه‌شانده‌وه‌ و له‌وكه‌ته‌شه‌وه‌ تا ئه‌مڕ‌‌ۆ سوننه‌كان نه‌یاتوانیوه‌ له‌نێوان خۆیاندا كه‌سێك بۆ ئه‌و پۆسته‌ ده‌ستنیشان بكه‌ن، ئەمە لەکاتێکدایە کە دوو خولی پڕۆسەی دەنگدان بۆ هەڵبژاردنی سەرۆکێکی نوێ لە رۆژانی 13ـی 1ـی 2024 و 18ـی 5ـی 2024 بەڕێوەچووە، بەڵام هیچ یەکێک لە کاندیدەکان دەنگی پیویستیان بەدەستنەهێناوە و هەڵبژاردنی سەرۆکێکی نوێش کەوتووەتە خولی سێهەم.

په‌رله‌مان پشووه‌كه‌ی دواخست

بڕیاربوو رۆژی 9-5-2024 پشووی یاسادانان له‌ئه‌نجومه‌نی نوێنه‌رانی عیراق ده‌ستپێبكات، به‌ڵام به‌هۆی بڕیاره‌كه‌ی دادگای فیدراڵییه‌وه‌ كه‌ ئه‌نجومه‌نه‌كه‌ی پابه‌ندكرد كه‌ سه‌رۆكێك بۆ خۆی هه‌ڵبژێرێت، هاوكات پێویست بوو یاسای بودجه‌ هه‌مواربكرێته‌وه‌، بۆیه‌ پشووه‌كه‌ بۆ یه‌ك مانگ دواكه‌وت و خرایه‌ 9-6-2024، لەگەڵ ئەوەی لەو ماوەیەی کە پشووەکە درێژکرایەوە، رۆژی 3ـی 6ـی 2024 یاسای بودجە هەموارکرایەوە، بەڵام ئەوەی کە لەو ماوەیەدا لایەنەکان نەگەشتنە رێککەوتن لەسەری، هەڵبژاردنی سەرۆکێکی نوێ بوو بۆ پەرلەمانی عیراق.
PUKMEIDA