وه‌رگرتنی لیستی كاندیده‌كان بۆ هه‌ڵبژاردن كۆتایی دێت

PUKMEDIA

هەڵبژاردن

ئه‌مڕ‌ۆ 18-7-2024  دوا واده‌یه‌ كه‌ كۆمسیۆنی باڵای سه‌ربه‌خۆی هه‌ڵبژاردنه‌كانی عیراق بۆ وه‌رگرتنی لیستی كاندیدانی هه‌ڵبژاردنی خولی شه‌شه‌می په‌رله‌مانی كوردستان دیاریكردوه‌.

دوای ئه‌وه‌ی رۆژی 15ـی ته‌مموزی 2024، واده‌ی تۆماركردنی لیستی كاندیدان كۆتاییهات، به‌ڵام كۆمسیۆنی باڵای سەربەخۆی هه‌ڵبژاردنه‌كانی عیراق واده‌كه‌ی تا ئه‌مڕ‌ۆ 18ی ته‌مموز درێژكرده‌وه‌ به‌مه‌به‌ستی وه‌رگرتنی لیستی كاندیدانی هاوپه‌یمانێتی، حزبه‌كان، كاندیدانی تاك و پێكهاته‌كان بۆ هه‌ڵبژاردنی په‌رله‌مانی كوردستان.

پێشتر جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA ڕ‌ایگه‌یاندبوو: "كاتی وه‌رگرتنی لیستی كاندیده‌كان بۆ هاوپه‌یمانێتییه‌كان، لایه‌نه‌كان، كاندیده‌ تاكه‌كه‌سییه‌كان و كاندیده‌كانی ئه‌و پێكهاته‌یه‌ی كه‌ ده‌یانه‌وێت به‌شداری له‌هه‌ڵبژاردنه‌كانی په‌رله‌مانی كوردستان بكه‌ن تا كۆتایی ده‌وامی رۆژی پێنجشه‌ممه‌ 18/7/2024 ده‌بێت."

هاوكات له‌ دوایین ڕ‌اپۆرتی كۆمسیۆنی هه‌ڵبژاردندا، كه‌ كۆپییه‌كی بۆ PUKMEDIA  نێردراوه‌، ئاماژه‌ به‌وه‌ده‌كات: "له‌ ماوه‌ی (1/1/2024) بۆ (11/7/2024) زیاتر له‌ 800 هه‌زار ده‌نگده‌ر له‌هه‌رێمی كوردستان تۆماركراون له‌كاتی پرۆسه‌ی بایۆمه‌تری هه‌ڵبژاردنه‌كاندا، به‌ڵام نزیكه‌ی نیوه‌ی ئه‌و ژماره‌یه‌ سه‌ردانی ناوه‌نده‌كانی تۆماركردنیان نه‌كردووه‌ بۆ وه‌رگرتنی كارتی ده‌نگدان، له‌ كاتێكدا پارێزگای سلێمانی له‌ پله‌ی یه‌كه‌مدایه‌ له‌ڕ‌ووی گه‌ڕ‌اندنه‌وه‌ی كارتی بایۆمه‌تری بۆ هاوڵاتیان."

كۆمسیۆن ئه‌وه‌شده‌خاته‌ڕوو:" كۆی گشتی ژماره‌ی ده‌نگده‌ران له‌ هه‌رێمی كوردستان 3 ملیۆن و 789 هه‌زارو 360  ده‌نگده‌ره‌، كه‌له‌و ژماره‌یه‌ دوو ملیۆن و 901 هه‌زار و 80 ده‌نگده‌ر له‌كۆمسیۆن تۆماركراون.

كۆمسیۆنی باڵای هه‌ڵبژاردنه‌كانی عیراق، له‌ رۆژی چواری ته‌مموزه‌وه‌، ده‌ستیكردووه‌ به‌ وه‌رگرتنی لیستی كاندیدانی هاوپه‌یمانێتیی و حزبه‌كان و كاندیدانی تاك و پێكهاته‌كان، كه‌ خوازیارن به‌شداریی له‌ هه‌ڵبژاردنی خولی شه‌شه‌می په‌رله‌مانی كوردستان بكه‌ن.

بڕ‌یاریشه‌ دوای قۆناغی وه‌رگرتنی لیستی كاندیده‌كان، كۆمسیۆن جارێكی دیكه‌ تیروپشك بۆ پێدانی ژماره‌ به‌ لیست و كاندیده‌كان بكات، ئه‌مه‌ش له‌كاتێكدایه‌ به‌گوێره‌ی مه‌رسومی سه‌رۆكی هه‌رێمی كوردستان، 20ی 10ی 2024  خولی شه‌شه‌می هه‌ڵبژاردنی په‌رله‌مانی كوردستان به‌ڕ‌ێوه‌ده‌چێت.

PUKMEDIA