كۆمسیۆن پاداشتی كارمەندانی سەرسندوق دیاریی دەكات

PUKMEDIA

پڕۆسەی دەنگدان، دیناری عیراقی، لۆگۆی كۆمسیۆنی عیراق

كۆمسیۆنی باڵای سەربەخۆی هەڵبژاردنەكانی عیراق بڕی پاداشتی دارایی كارمەندانی سەر سندووقەكانی دەنگدانی بۆ هەڵبژاردنی پەرلەمانی كوردستان دیاریكرد، كە 150 هەزار دینار بۆ 250 هەزار دینار دەبێت.

جومانە غەلای وتەبێژی  كۆمسیۆنی باڵای سەربەخۆی هەڵبژاردنەكانی عیراق بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "پاداشتی دارایی بۆ كارمەندانی سەرسندوقەكانی دەنگدان كە مووچەخۆری حكومەت نین بڕی 250 هەزار دینار دەبێت، هەروەها ئەو فەرمانبەرانەش كەناویان بۆ سەرسندوقەكانی دەنگدان لەڕۆژی هەڵبژاردن هاتووەتەوە بڕی 150 هەزار دیناریان پێدەدرێت".

" پاداشتی دارایی ئەو كارمەندانە لەلایەن ئەنجومەنی كۆمسیارانەوە دیاریكراوە، كەبۆ یەك رۆژی كاركردنی سەرسندوقەكانی دەنگدانەو پێویستە دوای هەڵبژاردن لەماوەی شەش مانگدا پاداشتەكەیان پێبدرێت" جومانە غەلای وادەڵێت.
 
بڕیارە رۆژی 20-10-2024، هەڵبژاردنی بۆ خولی شەشەمی پەرلەمانی كوردستان بەڕێوەبچێت كە لەلایەن كۆمسیۆنی باڵای سەربەخۆی هەڵبژاردنەكانی عیراقەوە بەڕێوەدەبرێت و بۆ ئەو مەبەستەش زیاتر لە 41 هەزار كارمەندی بەشێوەی گرێبەست بۆ بەڕێوەبردنی پڕۆسەكە بەشێوەی تیروپشك وەرگرتووە.

PUKMEDIA