ئەندامێکی لیژنەی دارایی: بەمنزیکانە شایستەی دارایی جوتیارانی هەرێم خەرج دەکرێت

PUKMEDIA

د.نەرمین مەعروف ئەندامی لیژنەی دارایی لە ئەنجومەنی نوێنەران

ئەندامێكی لیژنەی دارایی رایدەگەیەنێت: "بەم نزیكانە زیاتر لە ٥٠٠ ملیار دینار وەك شایستەی دارایی بۆ جوتیارانی هەرێمی كوردستان خەرجدەكرێت"، دەشڵێت: "جگە لە هەرێم لە چەند پارێزگایەكی دیكەی عیراق خەرجكردنی پارەی گەنمی جوتیاران دواكەوتووە".

د.نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "لەبەردەوامی بەدواداچوونەكان بۆ مافی جوتیارانی هەرێمی كوردستان تایبەت بە دواكەوتنی شایستە داراییەكانی گەنمی ئەمساڵ، دوای پەیوەندیكردن بە هەردوو وەزارەتی بازرگانی و دارایی فیدڕاڵ دڵنیاییان پێداین كە بەم نزیكانە شایستە داراییەكانی جوتیارانی هەرێم خەرجدەكەن كە زیاتر لە ٥٠٠ ملیار دینارە".

راشیگەیاند: "جگە لە هەرێمی كوردستان لە چەند پارێزگایەكی دیكەی عیراق خەرجكردنی پارەی گەنمی جوتیاران دواكەوتووە، ئەوەش بەهۆی كەمی پارەی تەرخانكراو بۆ كڕینی گەنم لە بودجەی ئەمساڵ و زیادكردنی بڕی گەنمی وەرگیراو لە سایلۆكان لەسەروو ئەو بڕەی پێشتر لە پلانی وەزارەتی بازرگانی  دیاریكرابوو بەمەبەستی پشتگیری زیاتری جوتیاران و بەرهەمی خۆماڵی".

"بۆ ئەم مەبەستەش وەزارەتی بازرگانی داوای زیادكردنی تەرخانكراوی دارایی كردووە پشتبەست بە مادەی ٦٠ی یاسای بودجەی سێ ساڵەی فیدڕاڵی ژمارە ١٣ی ساڵەكانی ٢٠٢٣ ، ٢٠٢٤، ٢٠٢٥ كە دەسەڵات دەداتە ئەنجومەنی وەزیران بە زیادكردنی تەرخانكراوی دارایی بۆ  چەند بڕگەیەكی خەرجی گرنگ لەنێویشیاندا  كڕینی دانەوێڵە" د.نەرمین مەعروف وادەڵێت.

PUKMEDIA