کۆمسیۆن: وردبینی لەناوی کاندیدان بەردەوامە

PUKMEDIA

کۆمسیۆن و پرۆسەی هەڵبژاردن

کۆمسیۆنی باڵای سەربەخۆی هەڵبژاردنەکانی عیراق رایگەیاند، کە پرۆسەی وردبینی لە ناوی کاندیدانی هەڵبژاردنی پەرلەمانی کوردستان بەردەوامەو دوای ئەم پرۆسەیەش کۆمسیۆن کاتی دەستپێکردنی بانگەشە رادەگەیەنێت.

جومانە غەلای وتەبێژی  كۆمسیۆنی باڵای سەربەخۆی هەڵبژاردنەكانی عیراق بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "کۆمسیۆنی باڵای سەربەخۆی هەڵبژاردنەکانی عیراق بەردەوامە لە وردبینی ناو و کەسایەتی کاندیدانی هەڵبژاردنی خولی شەشەمی پەرلەمانی کوردستان".

"دوای کۆتایی هاتنی ئەم پرۆسەیە کۆمسیۆن ناوی کاندیدان پەسەند دەکات و کاتی دەستپێکردنی بانگەشە بۆ هەڵبژاردن رادەگەیەنێت"، جومانە غەلای وادەڵێت.

كۆمسیۆن: زیاتر لە 200 هەزار دەنگدەر تائێستا كارتی دەنگدانیان وەرنەگرتووەتەوە

پێشتریش وتەبێژی كۆمسیۆنی باڵای سەربەخۆی هەڵبژاردنەكانی عیراق ژمارەی كارتی دەنگدەرانی پارێزگاكانی هەرێمی بڵاوكردەوەو رایگەیاند: "لەهەر چوار پارێزگاكەی هەرێم لەكۆی  2 ملیۆن و 899 هەزارو 578 كارتی دەنگدان 2 ملیۆن و 685 هەزارو 466 كارتی دەنگدان لەلایەن خاوەنەكانیانەوە وەرگیراونەتەوەو 214 هەزارو 112 كەسیش تاوەكو ئێستا كارتەكانیان وەرنەگرتووەتەوە.

139 لیست ناویان تۆمارکردووە

بۆ هەڵبژاردنی خولی شەشەمی پەرلەمانی کوردستان کە بڕیارە لە رۆژی 20ـی 10ـی 2024 بەڕێوەبچێت، 139 لیست لە نێوانیاندا 2 هاوپەیمانی و 13 حزب ناویان تۆمارکردووە بۆ بەشداریکردن لە هەڵبژاردنەکەدا.

هەروەها بۆ هەڵبژاردنەکە 124 کاندید ناوی خۆیان تۆمارکردووە، بەجۆرێک 85 کاندیدی سەربەخۆ و 20 کاندیدی تورکمان و 19 کاندیدی مەسیحی، کاندیدە تورکمانەکان بەمشێوەیە بەسەر بازنەکاندا دابەشبوون، هەولێر 14 کاندید و سلێمانی 6 کاندید، هەروەها کاندیدە مەسیحیەکان بەمشێوەیە بەسەر بازنەکانی هەڵبژاردندا دابەشبوون، هەولێر 7 کاندید و سلێمانی 4 کاندید و دهۆک 8 کاندید.

PUKMEDIA