سەرۆككۆمارو سەرۆكوەزیران جەخت لەبەهێزكردنی ئاسایش و خزمەتكردنی هاووڵاتیان دەكەنەوە

نووسینگەی سەرۆككۆماری عیراق

د.لەتیف جەمال رەشید سەرۆككۆماری عیراق و محەمەد شیاع سودانی سەرۆكی ئەنجومەنی وەزیران

د.لەتیف جەمال رەشید سەرۆككۆماری عیراق پێشوازی لە محەمەد شیاع سودانی سەرۆكی ئەنجومەنی وەزیران كرد و جەختیان لەبەرەنگاربوونەوەی گەندەڵی ئیداری و دارایی و پێشخستنی وەبەرهێنان و خزمەتكردنی هاووڵاتیان كردەوە.

لەڕاگەیەندراوێكی سەرۆكایەتی كۆماردا كە كۆپییەكی بۆ PUKMEDIA نێردراوە، راگەیەندراوە: "لەدیدارێكدا كە رۆژی 8-9-2024 بەڕێوەچوو، سەرۆككۆمارو سەرۆكی ئەنجومەنی وەزیران بارودۆخی گشتیی وڵات و پێشهاتە سیاسی و ئەمنی و ئابورییەكانیان تاووتوێ كردو و جەختیان لەسەر گرنگی یەكخستنی ریزی نیشتمانی و كاری هاوبەش لەپێناو پاراستن و بەهێزكردنی ئاسایش و سەقامگیری و باشتركردنی بژێوی و خزمەتكردنی هاووڵاتیان و بەدیهێنانی خواستەكانیان كردەوە".

ئەوەشخراوەتەڕوو: "هەر لەدیدارەكەدا جەخت لەسەر گرنگی پاڵپشتیكردنی رێوشوێنەكانی حكومەت بۆ جێبەجێكردنی بەرنامە وەزارییەكەی كرایەوە، بەتایبەت ئەوانەی پەیوەندییان بە پێداویستییەكانی هاووڵاتیان و باشتركردنی بارودۆخی ئابوری و بەرەنگاربوونەوەی گەندەڵی ئیداری و دارایی و پێشخستنی وەبەرهێنان و كەرتی تایبەت و كاریگەرییەكانی لەسەر بنیاتنان و ئاوەدانكردنەوە، هەیە". 

ئاماژە بەوەشدراوە: "سەرۆككۆمارو سەرۆكوەزیران جەختیان لەسەر گرنگی یەكلاكردنەوەی شایستە دەستورییەكانی پەیوەندیدار بەپێویستی هەڵبژاردنی سەرۆكی ئەنجومەنی نوێنەران كردەوە لەپێناو كاراكردن و بەهێزكردنی رۆڵی پەرلەمان لە چاودێری و یاسادانان و هاوئاهەنگیكردن لەگەڵ دەسەڵاتی جێبەجێكردن".

PUKMEDIA