لیستی پارتی و 7 كاندیدی سزادەدرێن

PUKMEDIA

کۆمسیۆن و پەرلەمانی کوردستان

ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكانی عیراق سزای دارایی بەسەر 11 كاندیددا دەسەپێنێت كە زۆرترینیان كاندیدی پارتی دیموكراتی كوردستان و پێشێلكاری بڕیارەكانی كۆمسیۆنیان كردووە.

بەگوێرەی بڕیارەكانی ئەنجومەنی كۆمسیاران كە كۆپییەكی دەست PUKMEDIA كەوتووە، ئەمڕۆ 6-10-2024، ئەنجومەنەكە تاوتوێی 14 سكاڵای كردو 11 سكاڵایانی بەسزادانی دارایی بەبڕی 500 هەزار دینار بۆ هەر سەرپێچیەكیان یەكلا كردەوەو سێ سكاڵاشی رەتكردەوە.

هەربەپێی بڕیارەكانی ئەنجومەنی كۆمسیاران، ئەو 11 سكاڵایەی بەسزادانی دارایی یەكلا كراونەتەوە 8 سكاڵایان لەدژی كاندیدانی پارتی و لیستەكەی تۆماكراون كە سەرپێچی و پێشێلكاریان كردووەو بە 4 ملیۆن دینار سزادراون كە بۆ هەریەكێكیان بڕی 500 هەزار دینارە.

هاوكات سێ سكاڵاكەی دیكەش یەكێكیان لەسەر كاندیدێكی نەوەی نوێیەو بەبڕی 500 هەزار دینار سزادراوە، كاندیدێكی دیكەش یەكێتییەو دانەیەكی دیكەشیان سەربەخۆیە.

بەپێی زانیارییەكانی  PUKMEDIA ، تێكڕای سزا داراییەكە 5 ملیۆن و 500 هەزار دینارەو ئەنجومەنەكەش لە پێنج بڕیاری جیاوازدا سكاڵاكانی یەكلاكردووەتەوە كە كۆبوونەوەی جەماوەری و بانگەشەی پێشوەختەیان كردووە.
 
PUKMEDIA