مەكتەبی سیاسی: زانكۆی سلێمانی پێشڕەو و یەكەمینە

PUKMEDIA

لۆگۆی یەكێتیی نیشتمانیی كوردستان

مەكتەبی سیاسیی یەكێتیی نیشتمانیی كوردستان لە پەیامێكدا پیرۆزبایی سەركەوتنە مێژووییەكەی زانكۆی سلێمانی دەكات و رایدەگەیەنێت: "زانكۆی سلێمانی، لەسەر پێشنیاز و كۆششی سەرۆك مام جەلال دامەزراوەو هەمیشە پێشڕەو و یەكەمینە و خەرمانی داهێنان و زانستی پڕ بەرهەم و داهێنان بووە".

دەقی پەیامەكە:

پیرۆزباییەكی گەرم لە سەرۆكایەتی زانكۆی سلێمانی و مامۆستایان و خوێندكارانی خۆشەویست دەكەین، بە بۆنەی بە دەستهێنانی پلەی یەكەم لەسەر ئاستی زانكۆكانی عیراق، ئەم دەستكەوتە زانستییە شانازییەكی گەورەیە بۆ كوردستان بەگشتی و شارە حەیاتەكەی سلێمانی، بەتایبەتی .

زانكۆی سلێمانی، وەك دایكی زانكۆكانی كوردستان كە ساڵی ١٩٦٨ لەسەر پێشنیاز و كۆششی سەرۆك مام جەلال دامەزراوە لە مێژوی خزمەتی زانستی و فەرهەنگی و كۆمەڵایەتی خۆیدا،هەمیشە پێشڕەو و یەكەمینە و خەرمانی داهێنان و زانستی پڕ بەرهەم و داهێنان بووە. 

لەم رێرەوە گەشەكردووەدا سەرەرای بەربەستە سیاسیی و شۆڤێنییەكانی بەردەمی لە رۆژگاری رژێمی بەعسدا ، ساڵی ١٩٩٢ ، دوای راپەڕینی كوردستان، گەڕایەوە كۆڕی خزمەت بە رۆڵەكانی گەلەكەمان لە كچان و كوڕانی كۆمەڵی كوردەواری و بووە وێستگەیەكی درەوشاوەی زانست و زانیاری كە وا زیاتر لە سێ دەیەیە چەندین نەوەی خوێندەوار و پێگەیشتووی پێشكەشی رەوتی گەشەكردنی وڵاتەكەمان كردووە و بۆتە بڕاندێكی جێی شانازی بۆ شاری سلێمانی لە كوردستان و عیراق و دەرەوەشدا .

لەم سۆنگەیەوە و بەرەچاوكردنی پێگەی روناكبیری و زانستی و رۆڵ و ناوبانگی زانكۆی دایك لە بزووتنەوەی خوێندكاری و كۆمەڵایەتی و سیاسیی گەلەكەشماندا ، یەكێتیی نیشتمانیی كوردستان چ لەرێی حكومەت و چ وەك حزبیش هەمیشە پاڵپشتی زانكۆی سلێمانی بووەو دەبێت . بەتایبەتی سەرۆك بافل جەلال تاڵەبانی كە لەم رێگا دروستەدا ،سەرەڕای جیاكاری و گەمارۆی سەر سلێمانی، درێغی نەكردووە و ناكات لەوەی ئاوەدانی و بوژانەوە، لەم زانكۆ ئازیزەدا لەسەر هیچ بەربەست و بیانووەیەك، پەك نەخرێت.
جارێكی تر پیرۆزە لە سلێمانی گەشاوەو زانكۆ هەمیشە گەشاوەكەی. 

مەكتەبی سیاسیی
یەكێتیی نیشتمانیی كوردستان
٩-١٠-٢٠٢٤

PUKMEDIA