پارتی لەدهۆک رێگری لە لایەنگرانی یەکێتی دەکات

PUKMEDIA

رێگری لە ئۆتۆمبێلەکانی یەکێتی دەکرێت

پارتی لەرێگەی بازگەکانی دهۆکەوە رێگری دەکەن لەلایەنگرانی یەکێتی کەبەشداری لە کەرنەڤاڵی ناساندنی کاندیدەکانی لیستی ١٢٩ی یەکێتی بکەن و رێگرییان لەسەدان لایەنگری یەکێتی کردووە، ئەندامێکی سەرکردایەتی یەکێتیش دەڵێت: " ئەو کار و لەمپەرە بچوکانە یەکێتیی راناگرن".

غەیاس سورچی لێپرسراوی راگەیاندنی مەڵبەنی نەینەوای یەکێتیی نیشتمانیی کوردستان بە PUKMEDIA ی راگەیاند: "پارتی لەلایەن بازگەکانی ئاسایشیەوە کەلە چواردەوری دهۆکن رێگری دەکەن لە هاتنی لایەنگرانی یەکێتی بۆ بەشداریکردن لە کەرنەڤاڵی ناساندنی کاندیدەکانی لیستی ١٢٩ی یەکێتی لە پارێزگای دهۆک، کە بڕیارە پاشنیوەڕۆی ئەمڕۆ بەڕێوەبچێت".

"پارتی لە بازگەی بەدریک رێگری لە سەدان ئۆتۆمبێلی لایەنگرانی یەکێتی کردوەو بەمەبەست رایاندەگرێت و بۆ چەند سەعاتێک بەناوی پشکنینەوە دەیانهێڵێتەوە، ئەمەش تەنها لەپێناو ئەوەی نەتوانن بەشداری کەنەڤاڵەکە بکەن"، غەیاس سورچی وای وت.

لێپرسراوی راگەیاندنی مەڵبەنی نەینەوای یەکێتی دەشڵێت: "بازگەکانی ئاسایشی پارتی کەلە دەوری دهۆک هەن تەنها ئەو ئۆتۆمبێلانە رادەگرن کە ئاڵای یەکێتی و بانگەشە بۆ یەکێتی دەکەن، لەکاتێکدا رێگە بە ئۆتۆمبێلی ئەو هاووڵاتیانە دەدات کە تەنانەت خەڵکی هەرێمی کوردستانیش نین و دەیانەوێت بچنە ناو دهۆکەوە".

ئەوە پێشێلکاریی زەقی کۆمسیۆن و ئازادییە

لەتیف نێروەیی ئەندامی سەرکردایەتی یەکێتیی نیشتمانیی کوردستان و لێپرسراوی بۆردی راگەیاندن بە وێبسایتی رەسمی یەکێتی PUKMEDIA ی راگەیاند:" جەماوەر و هەڤاڵانمان لە بادینان بە پەرۆشن بۆ بەشدارییکردن لە کەرنەڤاڵی بانگەشەی لیستی یەکێتیی ژمارە 129 کە سەرۆک بافڵ تاڵەبانی ئامادەدەبێت و وەک کەرنەڤاڵەکانی دیکە پەیامی نوێی دەبێت".

"بەداخەوە باڵێکی خۆسەپێنی پارتی  ئاستەنگ  بۆ جەماوەر و لایەنگرانمان دروست دەکەن لە بازگەکان و کە ئەوە پێشێلکاریی زەقی کۆمسیۆن و ئازادییە، بەڵام ئەو کار و لەمپەرە بچوکانە یەکێتیی راناگرن"، هەروەک دووپاتیکردەوە کە ئەو باڵە خۆسەپێنە ئاستەنگ بۆ خودی کاک نێچیرڤان بارزانی جێگری یەکەمی پارتیش لە دهۆک دروست دەکەن، ئیتر چۆن بۆ لایەنەکانی دیکەی دروست ناکەن"، لەتیف نێروەیی وای وت.

بڕیارە پاش کەمێکی تر شەشەمین کەرنەڤاڵی ناساندنی کاندیدەکانی لیستی ١٢٩ی یەکێتیی نیشتمانیی کوردستان لە پارێزگای دهۆک بەڕێوەبچێت و بافڵ جەلال تاڵەبانی سەرۆکی یەکێتیی نیشتمانیی کوردستان لەکەرنەڤالەکەدا وتارێک پێشکەش بە لایەنگرانی یەکێتی و سەرجەم خەڵکی هەرێمی کوردستان دەکات.

PUKMEDIA