شێخ جەعفەر شێخ مستەفا: بەهیزكردنی ئیرادەی گۆڕانكاری بە دەنگدان بەلیستی یەكێتی دەبێت

PUKMEDIA

كۆبوونەوەی شێخ جەعفەر شێخ مستەفا لەگەڵ بەشێكی زۆر لە رێكخستن و تێكۆشەرانی دێرینی سنووری سلێمانی

شێخ جەعفەر شێخ مستەفا لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان  رایدەگەیەنێت: "بۆ بەهێزكردنی ئیرادەی گۆڕینی دەسەڵات، لە رۆژی 20ی مانگدا گرنگە راپەڕینێكی دەنگدان بەرپابكەین و بەجۆش خرۆشەوە روو لە ناوەندەكانی دەنگدان بكەین و دەنگ بدەین بەلیستی ١٢٩".

ئەم وتەیەی شێخ جەعفەر لە میانی كۆبوونەوەیەكیدا بوو لەگەڵ بەشێكی زۆر لە رێكخستن و تێكۆشەرانی دێرینی سنووری سلێمانی و دەوروبەری كە هەریەك لە هەڤاڵان جەمیل هەورامی لێپرسراوی كۆمەڵەی پێشمەرگە دێرینەكان و مامۆستا عوسمان مەلا عەبدوڵڵا جێگری سەرۆكی كۆمەڵەی رێكخستنەكان و جوتیار نوری ئامادەیبوون.
 
شێخ جەعفەر باسی لە شێوازی خراپی حوكمڕانی هەرێم و پێویستی كاركردنی جددی بۆ ئەنجامدانی گۆڕانكاریی كردو جەختیكردەوە كە یەكێتی پێی ناوەتە قۆناغێكی تری حزبایەتی و ژیانی سیاسی، ئێستا یەكێتی یەك دەنگ و یەك هەڵوێستە و خاوەنی سەرۆك و بەرنامەی راست و رەوانی خۆیەتی، بۆیە  دەتوانێت ئەركی گۆڕانكاریی لەشێوازی حوكمڕانی بەئاراستەی باشتركردنی باروگوزەرانی خەڵك جێبەجێ بكات.

لەبەشێكی كۆبوونەوەكەدا، هەریەك لە هەڤاڵان  جەمیل هەورامی لێپرسراوی كۆمەڵەی پێشمەرگە دێرینەكان و مامۆستا عوسمان مەلا عەبدوڵا جێگری سەرۆكی كۆمەڵەی رێكخستنەكان، وتەیان پێشكەشكردو تێیدا باسیان لەڕۆڵی رێكخستنە دێرینەكان كرد، هەروەها ئامادەبووانیان هاندا رۆژی 20ی مانگ، خۆیان و كەسوكاریان، بەجۆش و خرۆشەوە روو لە سندووقەكانی دەنگدان بكەن و دەنگ بدەن بە لیستی ١٢٩ ی یەكێتی.

PUKMEDIA