63 کاندیدی لایەنەکانی دیکە هاتوونەتە نێو ریزەکانی یەکێتییەوە

PUKMEDIA

جەماوەری یەکێتیی نیشتمانیی کوردستان

زیاتر لە 60 کاندیدی لیستەکانی بزووتنەوەی گۆران و  بەرەی گەل و هاوپەیمانیی نیشتمانی و سەربەخۆ و هەڵوێست، لە سنووری هەرچوار بازنەکەی (هەولێر و سلێمانی  و دهۆک و هەڵەبجە) دەستیان لەکار کێشاوەتەوە و هاتوونەتە نێو ریزەکانی یەکێتیی نیشتمانیی کوردستانەوە.

بەگوێرەی بەدواداچوونی رۆژنامەوانی PUKMEDIA، تەنیا  لە رۆژانی رابردوو دا لە 9/10ەوە تا 18/10 63 کاندیدی لیستەکانی دیکەی هەڵبژاردنی خولی شەشەمی پەرلەمانی کوردستان، هاتونەتە نێو ریزەکانی یەکێتیی نیشتمانییەوە و درێژە بەخەبات و خزمەت دەدەن و کار بە سەرخستنی ستراتیژ و بەرنامەی یەکێتی دەکەن.

بەگوێرەی وتەی ئەو کاندیدانەی وازیانهێناوە و ئێستا لە نێو یەکێتی دا کاردەکەن، بەتایبەت ئەوانەی وازیان لە لیستی بەرەی گەل هێناوە، ئاشکرای دەکەن کە لەلایەن پارتی دیموکراتی کوردستانەوە پشتیوانی ماددی کراون و لیستی دووەمی پارتیی بوە، بۆیە دەستیان لەکار کێشاوەتەوە.

هەروەک سەرجەم کاندیدەکان باوەڕ و متمانەیان بە ستراتیژ و سیاسەت و بەرنامەی یەکێتی هەیە بۆ گۆرانکاریی و راستکردنەوەی رێرەوی چەوتی حوکمڕانی.

سبەی هەینی پرۆسەی دەنگدانی تایبەت بۆ خولی شەشەمی پەرلەمانی کوردستان دەست پێدەکات و رۆژی یەکشەممەش 20/10/2024 پرۆسەی دەنگدانی گشتی دەستپێدەکات و سیستمی ئەمجارە فرەبازنەییە و هێزە سیاسییەکان کێبڕکێ بۆ 95 کورسی پەرلەمان دەکەن و 5 کورسیش بۆ کۆتای پێکهاتەکانە.

PUKMEDIA