شاڵاو کۆسرەت رەسوڵ: دەنگەکانی یەکێتی لەهەولێر بۆ دووهێندە زیادی کردووە

PUKMEDIA

شاڵاو کۆسرەت رەسوڵ

شاڵاو کۆسرەت رەسوڵ سەرۆکی لیستی یەکێتیی نیشتمانیی کوردستان پاش راگەیاندنی ئەنجامە بەراییەکانی هەڵبژاردن لەلایەن کۆمسیۆنی باڵای سەربەخۆی ‌هەڵبژاردنەکانی عیراقەوە پەیامێک بڵاودەکاتەوەو رایدەگەیەنێت: "پیرۆزبایی گەرمی خۆم ئاراستەی کۆمەڵانی خەڵکی کوردستان و یەکێتییەکان دەکەم، بە بەشداری بەگڕوتینی هاووڵاتیان توانیمان دەنگەکانی یەکێتیی بۆ دوو هێندە بەرز بکەینەوە".

پەیامێک لە شاڵاو کۆسرەت رەسوڵ-ەوە...

بە بۆنەی کۆتایی هاتنی پرۆسەی هەڵبژاردنی خولی شەشەمی پەرلەمانی کوردستان و بەشداری گەرم و گوڕی هاووڵاتیان لە پرۆسەکە پیرۆزبایی گەرمی خۆم ئاراستەی کۆمەڵانی خەڵکی کوردستان بەگشتی و یەکێتییەکان بە تایبەتی دەکەم.

بۆ ئێمە لە یەکێتیی نیشتمانیی کوردستان بەگشتی و لە هەولێر بە تایبەتی، ئەم پرۆسەیە زۆر چارەنووسساز بوو، سوپاسێکی تایبەتی هەولێرییەکان و جەماوەرو دەنگدەرو ئەندام و لایەنگرانی یەکێتیی لە هەولێر دەکەم، کە بە گڕوتینەوە بەشداریان لە پرۆسەکە کردو توانیمان دەنگەکانی یەکێتیی بۆ دوو هێندە بەرز بکەینەوە و بەندەش زۆرترین دەنگ لەسەر ئاستی کاندیدەکانی کوردستان بەدەست بێنین، کە ئەمەش قۆناغێکی گرنگەو بەرپرسیارێتی زیاتر دەخاتە سەرشانمان.

هەموو لایەک دڵنیا دەکەینەوە کە بەردەوام دەبین و لە کوردستان بە گشتی و هەولێر بە تایبەتی کاردەکەین و لەگەڵتان دەبین و داکۆکی لە مافەکانتان دەکەین و خزمەتتان دەکەین.


شاڵاو کۆسرەت رەسوڵ 
سەرۆکی لیستی یەکێتیی نیشتمانیی کوردستان
لە پارێزگای هەولێر
٢١/١٠/٢٠٢٤

PUKMEDIA