وتەبێژی کۆمسیۆن: ئەنجامی ئەلکترۆنی و دەستی هاوشێوە بوون

PUKMEDIA

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق

وردبینی بۆ ئەو ٢٦ وێستگەیەی کە سکاڵایان لەسەربوو، هاوکات ئەنجامەکانی نەنێردرابوون بۆ کۆمسیۆن تەواو بوو، وتەبێژی کۆمسیۆنیش دەڵێت:" ئەنجامی وردبینی دەستی و ئەلکترۆنی هاوشێوە بوون و هیچ گۆڕانکارییەک لەدەنگەکاندا نییە".

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بەسایتی رەسمیی یەکێتیی نیشتمانیی کوردستان PUKMEDIA ی راگەیاند:" دوای ئەوەی ٢٦ وێستگە لەهەرێمی کوردستان سکاڵایان لەسەربوو، لەسێ رۆژی رابردوودا هەژماری دەستی لەو وێستگانە دەستیپێکرد و ئەمڕۆ کۆتایی هات".

"بەپێی ئەنجامی هەژماری دەستی و ئەلکترۆنی دەرکەوت کە هاوشێوەی یەکن، بەمەش هیچ گۆڕانکارییەک لەڕێژەی دەنگەکاندا روینەدا"، جومانە غەلای وایوت.

وتیشی:" وردبینی ئەو وێستگانە بەچاودێری نوێنەری لایەنەکان و چاودێرانی ناوخۆیی و بیانیی و کەناڵەکانی راگەیاندن بەڕێوەچوو".

لەهەڵبژاردنی خولی شەشەمی پەرلەمانی کوردستاندا ٢٦ وێستگە کە ١٣ وێستگەیان لە هەولێر و ٦ وێستگەیان لەسلێمانی و ٧ وێستگەیان لەدهۆک بوون، بەهۆی نەناردنی ئەنجامەکانیان و جیاوازی هەژماری دەستی و ئەلکترۆنی کە زیاتربوو لە ٥٪ کۆمسیۆن بڕیاریدا دووبارە پرۆسەی هەژمارکردن لەو وێستگانە بکرێتەوە، بەڵام دواجار ئەنجامە دەستییەکان هاوشێوەی ئەنجامە ئەلکترۆنییەکان بوون و هیچ گۆڕانکارییەک لەدەنگەکاندا رووینەدا.

کۆمسیۆن دوای ئەنجامدانی هەڵبژاردن ٣ رۆژی تەرخانکرد بۆ هەژماری دەستی ٢٦ وێستگە، کە سکاڵایان لەسەربوو سەرەتا لە دهۆکەوە دەستیانپێکرد و پاشان لەسلێمانی و دواتریش لەهەولێر.

PUKMEDIA