دەنگدان بەسێ پرۆژەیاسا لە کارنامەی ئەمڕۆی پەرلەمانی عیراق دایە

PUKMEDIA

ئەنجومەنی نوێنەرانی عیراق

بڕیارە ئەمڕۆ یەکشەممە27/10/2024 ، ئەنجوومەنی نوێنەرانی عیراق کۆببێتەوە و دەنگ لەسەر سێ پرۆژەیاسا بدات کە لە دانیشتنەکانی پێشتردا بە هۆکاری جیاواز دواخراون و یەکێک لەو پرۆژانە پەیوەستە بە گەڕاندنەوەی موڵکوماڵی ئەوانەی بەبڕیاری ئەنجومەنی هەڵوەشاوەی بەعس لە خاوەنەکانیان زەوتکراوە لەگەڵ هەمواری یاسای باری كەسێتی و هەمواری یاسای لێبوردنی گشتی.

بە گوێرەی خشتەی دانیشتنی پەرلەمانی عیراق ، دەنگ  لەسەر پرۆژەیاسای گەڕاندنەوەی ئەو موڵکانەی دەدرێت کە بە بڕیارى ئەنجومەنی سەرکردایەتیی شۆڕشی هەڵوەشاوە لە خاوەنەکانیان زەوتکراوە و دەستیان بەسەرداگیراوە.

تێپەڕاندنی پڕۆژەیاسای گەڕاندنەوەی موڵك و ماڵ بۆ خاوەنەكانیان بۆ كورد گرنگە

كاروان یاروەیس بڕیاردەری فراكسیۆنی یەكێتی لەئەنجومەنی نوێنەران بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "پاش ئەوەی ئەنجومەنی نوێنەرانی عیراق، بەهۆی هەڵبژاردنی پەرلەمانی كوردستانەوە سێ هەفتە دانیشتنەكانی راگرتبوو،  ئەمڕۆ كۆدەبێتەوە، كارنامەی دانیشتنەكەش سێ پڕۆژەیاسا دڵخوازەكەی كوردو شیعەو سووننەی تێدایە كە بریتین لە، هەڵوەشاندنەوەی بڕیارەكانی مەجلیس قیادە سەورە، هەمواری یاسای باری كەسێتی، هەمواری یاسای لێبوردنی گشتی".

"تێپەڕاندنی پڕۆژەیاسای گەڕاندنەوەی موڵك و ماڵ بۆ خاوەنەكانیان كەهەڵوەشاندنەوەی ژمارەیەك بڕیاری مەجلیسی قیادەی سەورەی بەعسە، هاوكات سڕینەوەی ئاسەواری تەعریب و تەرحیل بۆ كورد گرنگە، بەڵام لەبەرامبەردا تێپەراندنی دوو پڕۆژە هەموارەكەی یاساكانی باری كەسێتی و لێبوردنی گشتییە كە لەئایندەدا بۆ كوردو كۆی كۆمەڵگای عیراقی كاریگەری نەرێنی زۆریان دەبێت"، كاروان یاروەیس وایوت.

زیاتر لەیەك ملیۆن دۆنم زەوی دەگەڕێتەوە بۆ خاوەنەكانیان

راشیگەیاند: "هیچ كام لەپێكهاتەكان متمانەی بەپێكهاتەكەی دیكە نییە، بۆیە لەكارنامەی دانیشتنەكەدا هەرسێ پڕۆژەیاسای هەڵوەشاندنەوەی بڕیارەكانی مەجلیس قیادە سەورە، هەمواری یاسای باری كەسێتی، هەمواری یاسای لێبوردنی گشتی، بەیەكەوە دانراون".

بە پەسەندكردنی پرۆژەیاسای هەڵوەشاندنەوەی بریارەکانی ئەنجومەنی سەورەی بەعس زیاتر لەیەك ملیۆن دۆنم زەوی كە زۆربەیان لە كەركوك و ناوچە جێناكۆكەكانن و زەوی كشتوكاڵی و موڵكی خەڵكن، دەگەڕێتەوە بۆ خاوەنەكانیان و چارەسەری ئەو كێشانە دەكرێت كەپێشتر لەسەریان دروست بووە و فراكسیۆنی یەكێتی گفتوگۆی جددی لەگەڵ زۆربەی فراكسیۆنەكان كردووە بۆ تێپەڕاندنی پڕۆژەیاساكە.

كاروان یاروەیس بڕیاردەری فراكسیۆنی یەكێتی لە ئەنجومەنی نوێنەرانی عیراق لەبارەی پڕۆژەیاسای گەڕاندنەوەی موڵك و ماڵ بۆ خاوەنەكانیان كەهەڵوەشاندنەوەی ژمارەیەك بڕیاری مەجلیسی قیادەی سەورەی بەعس، بە PUKMEDIA ی راگەیاند: "فراكسیۆنی یەكێتی كاری جددی لەسەر ئەم كەیسە كردووە كە جگە لە كورد، پێكهاتەكانی تریش لەكەركوك و ناوچە جێناكۆكەكان لێی سوودمەند دەبن".

PUKMEDIA