لە ئەمڕۆوە گەشتیار 3 هەزار دۆلار بەنرخی بانکی ناوەندی وەردەگرێت

ئەرشیف

دراوی ئەمریکی

لەئەمڕۆوە لە  فرۆکەخانەکانی هەولێر و سلێمانی دۆلاری ئەمریکی بەنرخی رەسمی بەو گەشتیارانە دەدرێت کە گەشت دەکەن و ئەندامێکی لیژنەی دارایی پەرلەمانی عیراقیش دەڵێت:" بۆ هەر گەشتیارێک بڕی 3000 دۆلاری بەنرخی 132 هەزار دینار بۆ هەر 100 دۆلارێک پێدەدرێت".

د.نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بە PUKMEDIA ی راگەیاند:" لە ئەمڕۆوە گەشتیاران کە لە هەردوو فرۆکەخانەی هەولێر و سلێمانییەوە گەشت دەکەن دۆلاریان بەنرخی رەسمی بانکی ناوەندی بۆ دەگۆڕدرێت، بەهاوشێوەی فرۆکەخانەکانی دیکەی عیراق".

"بانکی بازرگانی عیراقی (TBI) ئاگاداریکردینەوە بە تەواوبوونی رێکارە کارگێرییەکان، لەمەودوا گەشتیاران لە فڕۆکەخانەکانی هەرێمیشەوە دەتوانن بڕی سێ هەزار دۆلار لە مانگێکدا وەربگرن، کە نرخی 1 دۆلار بەرامبەر  بە  ١٣٢٠ دینارە لە نووسینگەی بانکی TBI لە فڕۆکەخانە و لە ئایندەیەکی نزیکدا بانکی جیهان بۆ هەمان مەبەست نووسینگە لەو دوو فڕۆکەخانەیە دەکاتەوە" د.نەرمین مەعروف وادەڵێت.

بانکی بازرگانی عیراقیش لە پەیامێکدا خۆشحاڵی دەردەبڕێت بە کردنەوەی بانکەکەیان لە فڕۆکەخانەی هەولێر و سلێمانی و دەڵێت:" ئەم دەروازانە بۆ پێشکەشکردنی خزمەتگوزاری گەیاندنی دۆلارە بە گەشتیاران و لە ئەمڕۆوە لە فڕۆکەخانەی سلێمانی 24 سەعات پێشوازیتان لێدەکەین". 

بەگوێرەی بەدواداچوونی PUKMEDIA نرخی ئەمڕۆی  100 دۆلاری ئەمریکی لە نوسینگەکانی دراو لە هەولێر و سلێمانی، بە 151.600 دیناری عیراقییە، هەرگەشتیارێک 600 هەزار دینار کەمتر لە نرخی بازاری دراوەکان ئەو برە دۆلارەی لە فرۆکەخانەکان پێدەدرێت.

هەریەک لە د.نەرمین مەعروف ئەندامی لیژنەی دارایی و د.بریار رەشید پەرلەمانتارانی فراکسیۆنی یەکێتیی نیشتمانیی کوردستان لە ئەنجومەنی نوێنەران هەوڵێ زۆریان دا تاوەکو لەو دوو فرۆکەخانەیەی هەرێمیش دۆلار بەنرخی بانکی ناوەندی بە گەشتیاران بدرێت بەهەمانشێوەی فرۆکەخانەکانی دیکەی عیراق.

PUKMEDIA