لەئەنجومەنی نوێنەران ئیمزا بۆ تەوتینی مووچە کۆکرایەوە

PUKMEDIA

نوسراوی رەسمیی کۆکردنەوەی ئیمزاکە

لەسەر داوای فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق، لەدانیشتنی ئەمڕۆی ئەنجومەنی نوێنەرانی عیراقدا 108 پەرلەمانتار ئیمزایان بۆ تەوتینکردنی مووچەی فەرمانبەرانی هەرێمی کوردستان کۆکردەوە.

لە نوسراوێکدا کە ئیمزای هەرێم کەمال ئاغا سەرۆکی فراکسیۆنی یەکێتیی نیشتمانیی کوردستانی لەسەرە و 108 پەرلەمانتاری لایەنە کوردستانییەکان جگە لە پارتی ئیمزایان لەسەرکردووە، تێیدا داوا لەسەرۆکی پەرلەمان دەکەن، تەوتینی مووچەی فەرمانبەرانی هەرێمی کوردستان دەستپێبکات و بڕیاری دادگای فیدراڵی عیراق جێبەجێبکرێت، هاوکات داوا لەسەرۆک وەزیران بکرێت لقی بانکەکان بکاتەوە و کار بۆ تەوتینکردنی مووچەی فەرمانبەران بکات.

ئیمزای پەرلەمانتاران داخوازی خەڵکە

کاروان یاروەیس بڕیاردەری فراکسیۆنی یەکێتی لە ئەنجومەنی نوێنەرانی عیراق بە PUKMEDIA ی راگەیاند: کۆکردنەوەی ئیمزای پەرلەمانتاران وەڵامدانەوەیەکە بۆ داخوازی خەڵک و مووچەخۆرانی هەرێمی کوردستان".

"تائێستا ئیمزای زیاتر (108) پەرلەمانتار و سەرۆکی فراکسیۆن کۆکراوەتەوە بۆ جێبەجێکردنی بڕیاری دادگای فیدرالی بۆ تەوتینکردنی مووچەی هەرێمی کوردستان." کاروان یارەویس وایوت.

ستران عەبدوڵڵا: روونە کێ لەگەڵ ویست و بەرژوەندی ژیان و گوزەرانی میللەتە 

ستران عەبدوڵڵا ئەندامی سەرکردایەتی یەکێتیی نیشتمانیی کوردستان بە PUKMEDIA دەڵێت:"تەوتینی مووچە کە بەڵێنی راست ورەوانی هەڵبژاردن و بڕیاری میللەتخوازی دادگای فیدراڵیشە، خەریکە هەڵوێستەکان لە مەحەکی راستی دەدات" .

"ئیتر روونە کێ لەگەڵ ویست و بەرژوەندی ژیان و گوزەرانی میللەتە و کێش خنەخن و لاکین و بەڵامێتی" ستران عەبدوڵڵا وادەڵێت.

 PUKMEDIA