خاتوو شاناز بەشداری كۆنگرەی ساڵانەی نێودەوڵەتی بۆ خێزان دەكات

نوسینگەی راگەیاندنی سەرۆكایەتی كۆمار

خانمی یەکەم ئامادەی چالاکییەکانی کردنەوەی کۆنگرەی ساڵانەی نێودەوڵەتی بۆ خێزان دەبێت

شاناز ئیبراهیم ئەحمەد خانمی یەكەمی عیراق رۆژی 30-10- 2024، بەشداری لەچالاكییەكانی كردنەوەی كۆنگرەی ساڵانەی نێودەوڵەتی بۆ خێزان لەیادی 30 ساڵەیدا كرد، كە بە دروشمی (خێزان و ئاڕاستە گەورەو سەردەمیانەكان) لەهۆڵی شانۆی مەیاسە لەدەوحەی پایتەختی قەتەر بەڕێوەچوو. 

لەمیانی كردنەوەی كۆنگرەكەدا، سەرۆكی ئەنجومەنی بەڕێوەبردنی دامەزراوەی قەتەر بۆ پەروەردە و زانست و پەرەپێدانی كۆمەڵگە، خاوەنشكۆ شێخە موزا بنت ناسر وتەیەكی پێشكەشكرد، كەئاڕاستەی خانمانی یەكەم و سەرۆك و كەسانی خاوەن بڕیارو رێكخراوە پەیوەندیدارەكانی كرد لەوڵاتانی جیهان و تێیدا گرنگی خێزان و دوارۆژی دووپاتكردەوە بەوپێیەی بەردی بناغەی بنیاتنانی كۆمەڵگەو ئەو ئاڵنگارییانەیە كەڕووبەڕووی دەبێتەوە، هاوكات رێورەسمی كردنەوەی كۆنگرەكە دەستپێشخەرییەكان و راسپاردەكانی پانێڵی تایبەت بەگەنجانی لەخۆگرت كەرۆژێك بەر لەدەستپێكی كۆنگرەی ساڵانەی نێودەوڵەتی بۆ خێزان سازكرابوو. 

هەر لەپەراوێزی كۆنگرەكەشدا لەدەوحە، خاتوو شاناز ئیبراهیم ئەحمەد ژمارەیەك دیدارو گفتوگۆی لەگەڵ خانمانی یەكەم و شارەزایانی تری بەشداری كۆنگرەكە ئەنجامدا، كەتێیدا تاوتوێی سیاسەت و ستراتیژە نیشتمانییەكانی كرد كەئامادەكراوە بۆ خزمەتی خێزان و شێوازی پارێزگاریكردن لە خێزان لەپێناو بنیاتنانی كۆمەڵگەی سەركەوتوو لەجیهانێكی باشتردا كەئارامی و سەقامگیری تێدا فەراهەم ببێت.

PUKMEDIA