جارێكی دیكە پەرلەمان بۆ هەڵبژاردنی سەرۆكەكەی كۆدەبێتەوە

PUKMEDIA

ئەنجومەنی نوێنەرانی عیراق

بڕ‌یارە ئەمڕۆ پێنج شەممە، دانیشتنی ئەنجومەنی نوێنەرانی عیراق بۆ هەڵبژاردنی سەرۆكێك بۆ ئەنجومەنەكە ئەنجام بدرێت، بڕ‌یاریدەری فراكسیۆنی یەكێتیش دەڵێت: "لەگەڵ ئەوەی تائێستا دووجاری دیكە پەرلەمان بۆ ئەو پرسە كۆبووەتەوە، بەڵام نەتوانراوە بگەینە هیچ بڕیارێك و بۆ كۆبوونەوەی ئەمڕۆش تائێستا هیچ رێككەوتنێك بۆ هەڵبژاردنی كاندیدێك بۆ سەرۆكی ئەنجومەنەكە نەكراوە".

كاروان یاروەیس بڕ‌یاردەری فراكسیۆنی یەكێتیی نیشتمانیی كوردستان لە ئەنجومەنی نوێنەرانی عیراق بە PUKMEDIA  ی راگەیاند: "بڕیارە ئەمڕۆ پێنج شەممە ئەنجومەنی نوێنەرانی عیراق دانیشتنی هەڵبژاردنی سەرۆك ئەنجام بدات".

تائێستا هیچ جۆرە رێككەوتنێك لەنێو پێكهاتەی سووننە و لایەنەكانی تر نییە بۆ تێپەڕاندنی كاندیدێكی دیاریكراو، هەروەها ئەمە سێهەمجارە پەرلەمان دانشتن بۆ هەڵبژاردنی سەرۆك ئەنجام دەدات و ناتوانرێت بگەینە هیچ رێكەوتنێك لەسەر هەڵبژاردنی كاندیدێك"، كاروان یاروەیس وای وت.


رۆژی 14-11-2023، دادگای باڵای فیدڕاڵی عیراق لەسەر سكاڵای پەرلەمانتارێك، ئەندامێتی محەمەد حەلبوسی سەرۆكی ئەنجومەنی نوێنەرانی هەڵوەشاندەوە، پاش ئەوەش چەند جارێك ئەنجومەنەكە بۆ هەڵبژاردنی سەرۆكێكی نوێ كۆبووەتەوە، بەڵام بەهۆی رێكنەكەوتنی لایەنەكانەوە تاوەكو ئێستا نەتوانراوە سەرۆكێك بۆ ئەنجومەنی نوێنەرانی عیراق هەڵبژێردرێت.

PUKMEDIA