بەم نزیکانە 500 پارچە زەوی لە سلیمانی بە کەسوکاری شەهیدان دەدرێت

PUKMEDIA

زەوی

بڕیارە بەمنزیکانە زەوی بەسەر نزیکەی 500 کەس لە کەسوکاری شەهیداندا دابەشبکرێت و بەرێوەبەری گشتيی كاروباری شەهیدان و ئەنفالکراوانی سلێمانیش دەڵێت:" دابەشکردنی زەوی بە تیروپشک و خاڵبەندییە و  ئەو کەسانە دەگرێتەوە کە پێشتر فەرمانی ئەنجومەنی وەزیرانیان بۆ دەرکراوە، بەڵام بەهۆی نەبوونی زەوییەوە، تائێستا وەریان نەگرتووە و دابەشکردنەکەی دواکەوتووە".

ئەدیب لەتیف بەڕێوەبەری گشتی کاروباری شەهیدان و ئەنفالکراوانی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" لەئێستادا ئامادەکاری دەکرێت بۆ پێدانی زەوی بەکەسوکاری شەهیداندا و دوای رێکخستنی ناوەکانی ئەو کەسانەی سوودمەند دەبن، هەفتەی ئایندە دەست بەدابەشکردنی زەوییەکان دەکرێت".

رووبەری ئەو زەوییەی بۆ هەر فەرمانبەرێک تەرخان دەکرێت 200 مەتر دووجا دەبێت؛ دابەشکردنی زەویش بە تیروپشک و خاڵبەندی دەبێت و سێ مەرج دیاریکراون کە ( ساڵانی خزمەت،  ژمارەی ئەندامانی خێزان، شوێنی نیشتەجێبوون) لە پێوەرەکانن.

"سەرۆکایەتی شارەوانی سلێمانی زەوییەکانی ئامادەکردووە و هەموو ئەو کەسوکاری شەهیدانەی ناویان لەلیستەکەدا هەیە لەوەرگرتنی زەوی سوودمەند دەبن، لە قۆناغی یەکەم بەتیروپشک زەوی بەسەر نزیکەی 500 کەس لە کەسوکاری شەهیدان دابەشدەکرێت". ئەدیب لەتیف وایوت.

لە بەڕێوەبەرایەتيی گشتی شەهیدان و ئەنفالکراوانی سلێمانی 43 هەزار مووچەخۆر هەیە و تائێستا 22 هەزار پارچە زەوی بە کەسوکاری شەهیدان و زیندانیانی سیاسیی دراوە و لە مانگی 3ی ئەمساڵ 2024 ئەنجومەنی وەزیرانی هەرێم بڕیاریدا زەوی بەسەر فەرمانبەر و خانەنشیناندا دابەش بکرێت بەمەرجێک پێشتر سوودمەند نەبووبن.

 PUKMEDIA