کرێی خوێندنی پارالێڵ کەمدەکرێتەوە

ئەرشیف

وەزارەتی خوێندنی باڵا و توێژینەوەی زانستیی

بەڕەچاوکردنی باری دارایی خوێندکاران ئەمساڵیش هاوشێوەی ساڵانی رابردوو کرێی خوێندن لە زانکۆ و پەیمانگە تایبەت و حکومییەکان کەمدەکرێتەوە، وتەبێژی وەزارەتی خوێندنی باڵا و توێژینەوەی زانستیش دەڵیت:" لە زانکۆ حکومییەکان کرێی خوێندنی پارالێڵ و ئێواران، بەرێژەی 45% کەمدەکرێتەوە و لە زانکۆ و پەیمانگە تایبەتەکانیش کرێی خوێندن بە رێژەی 10% بۆ 20% کەمدەکرێتەوە".

عەباس ئەکرەم وتەبێژی وەزارەتی خوێندنی باڵا و توێژینەوەی زانستیی بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند:"ئەمساڵیش هاوشێوەی ساڵانی رابردوو، بەڕەچاوکردنی باری دارایی خوێندکاران کرێی خوێندن لە زانکۆ و پەیمانگە تایبەت و حکومییەکان کەمدەکرێتەوە، بەجۆرێک لە زانکۆ حکومییەکان کرێی خوێندنی پارالێڵ و ئێواران، بەرێژەی 45% کەمدەکرێتەوە و لە زانکۆ و پەیمانگە تایبەتەکانیش کرێی خوێندن بە رێژەی 10% بۆ 20% کەمدەکرێتەوە و سەرجەم بەش و قۆناغەکان دەگرێتەوە".

وتیشی: "رێژەی کەمکردنەوەی کرێی خوێندن لە زانکۆ و پەیمانگە تایبەتەکان، لەسەر بنەمای ئەنجامی ریزبەندیی نیشتمانیی زانکۆ و پەیمانگەکان دیاریدەکرێن، واتە تاوەکو پلەی ریزبەندیی زانکۆ و پەیمانگەکە زیاتر بێت، ئەوا داشکاندنی زیاتری دەبێت لە نێوان 10% تاوەکو 20% ".

لە هەرێمی کوردستان 20 زانکۆی حکومی و 17 زانکۆ و 12 پەیمانگەى تایبەت هەن، لەئێستاشدا بەشێکی زۆر لە زانکۆ حکومییەکانیش خوێندنی پارالێڵیان تێدایە و خوێندکاران دەتوان بەپێی نمرەکانیان لەو بەشانە بخوێنن کەدەیانەوێت و کرێی خوێندن بەپێی بەشەکان و ئەو زانکۆیەی خوێندکار لێی دەخوێنێت دەگۆڕێت.

PUKMEDIA