سەعدی ئەحمەد پیرە: یەکێتی لەگەڵ چارەسەری ئاشتییانە دایە

نوسینگەی رۆژنامەوانی سەعدی ئەحمەد پیرە

سەعدی ئەحمەد پیرە و کونسڵی گشتی ئێران

 ئێوارەی یەكشەممە ٣/١١/٢٠٢٤  سەعدی ئەحمەد پیرە وتەبێژی رەسمیی یەكێتیی نیشتمانیی كوردستان، لە هەولێر پێشوازیكرد لە وەفدێكی كۆماری ئیسلامی ئیران كە پێكهاتبوو لە  نەسروڵڵا زارع رەشنوودی كونسوڵی گشتی كۆماری ئیسلامی ئیران لە هەرێمی كوردستان و ژمارەیەک لە راوێژکار و دیپلۆماتکاری ئەو وڵاتە.
 
لە دیدارێکدا بارودۆخی سیاسی ناوچەکە بەگشتی و عیراق و ھەرێمی کوردستان بەتایبەتی تاوتوێکرا و كونسڵی گشتی كۆماری ئیسلامی ئیران ڕایگەیاند:"كۆماری ئیسلامی ئیران بە بایەخ و گرنگییەکی زۆرەوە دەڕوانێتە بارودۆخی سیاسی عیراق بەگشتی و هەرێمی کوردستان بەتایبەتی لە پێناو سەقامگیری سیاسی و ئاشتی و بەرە‌و پێشچوونی پروسەی سیاسی و گەشەسەندنی ئابووری و ئاوەدانی زیاتر و بەھێزترکردنی دیموکراسی لە ناوچەکەدا" .
 
سەعدی ئەحمەد پیرە،تەئکیدیکردەوە کە یەكێتی خوازیاری چارەسەری دیپلۆماسیانەی کێشە سیاسییەکانە لەسەر بنەمای بەند و بڕگەکانی دەستوری هەمیشەیی عیراق لە ڕێگەی گفتوگۆی ئاشتیانە و لەیەکتر گەیشتن بە ئاراستەی چارەسەری گونجاو کە ببێتە مایەی خێر و خۆشی و سەقامگیری بۆ گەلانی عیراق".

هاوكات بەبۆنەی كۆتاییهاتنی ماوەی كاركردنی وەك سەركونسڵی گشتی كۆماری ئیسلامی ئیران, سەعدی ئەحمەد پیرە سوپاسی  نەسروڵڵا زارع رەشنوودی كرد كە لەماوەی ڕابردوودا  ڕۆڵیكی گرنگی بینیوە لەبەرەو پێش بردنی پەیوەندییە سیاسی و ئابوری و فەرهەنگییەكانی نێوان كۆماری ئیسلامی ئێران و هەرێمی كوردستان. ،هیوای سەركەوتنیشی بۆ  ئەرك و بەرپرسیارییەتییەكانی ئایندەی خواست.

PUKMEDIA