وتەبێژ: یەكێتی لیژنەیەك بۆ پێكهێنانی حكومەت پێكدەهێنێت

PUKMEDIA

سەعدی ئەحمەد پیرە وتەبێژی یەكێتیی نیشتمانیی كوردستان

یەكێتیی نیشتمانیی كوردستان بەسەرپەرشتی قوباد تاڵەبانی لیژنەیەك بۆ گفتوگۆ لەگەڵ لایەنەكان لەبارەی پێكهێنانی حكومەتی نوێی هەرێمی كوردستان پێكدەهێنێت، وتەبێژی یەكێتیش رایدەگەیەنێت: "یەكێتی پڕۆژەی خۆی بۆ پێكهێنانی حكومەتی داهاتوو هەیە".

سەعدی ئەحمەد پیرە وتەبێژی یەكێتیی نیشتمانیی كوردستان بەوێبسایتی رەسمی یەكێتی PUKMEDIA ی راگەیاند: "یەكێتی بۆ گفتوگۆككردن لەگەڵ لایەنەكان لەبارەی پێكهێنانی حكومەتی هەرێمی كوردستان لیژنەیەكی بەسەرپەرشتی قوباد تاڵەبانی ئەندامی مەكتەبی سیاسی یەكێتیی نیشتمانیی كوردستان و ئەندامێتی ژمارەیەك لە ئەندامانی مەكتەبی سیاسی پێكهێناوە".

"یەكێتی بۆ پێكهێنانی حكومەتی نوێی هەرێمی كوردستان پڕۆژەی خۆی هەیەو لەگەڵ لایەنەكان گفتوگۆی لەبارەوە دەكات، هاوكات بژاردەی پڕۆژەی لایەنەكانی دیكەش دەكات" سەعدی ئەحمەد وادەڵێت.

پێكهێنانی لیژنەكەی یەكێتی لەكاتێكدایە بافڵ جەلال تاڵەبانی سەرۆكی یەكێتیی نیشتمانیی كوردستان لەكۆبوونەوەی لەگەڵ باڵیۆزو كونسوڵی وڵاتان و دیداری مێری ئاماژەی بەوەكردووە: "تا ئێستا بڕیاريان نەداوە حكومەت لەگەڵ كێ پێكدەهێنین، بەڵام یەكێتی پەرۆشە بۆ پێكهێنانی حكومەتێكی خزمەتگوزارو تەندروست، حكومەتێك رەنگدانەوەی خواستەكانی خەڵك بێت و هیچ لایەنێك نەتوانێت مەرام و ویستەكانی خۆی بسەپێنێت و دامەزراوە حكومییەكان بۆ بەرژەوەندی خۆی بەكاربهێنێت.".
 
راشیگەیاند: "خواست و داواكارییەكانی خەڵك بەرنامەی كاركردنمانەو هەموو هەنگاوێك لەپێناو دابینكردنی داهاتوویەكی گەشتر دەنێین".


هەر لەوبارەیەوە قوباد تاڵەبانی لەكۆبوونەوەكانی لەگەڵ ژمارەیەك لەدیپلۆماتكاران لەبارەی پێكهێنانی حكومەت ئاماژە بەوەدەكات: "ئێمە بەرنامەی تایبەتی خۆمان هەیە بۆ چارەسەركردنی كەموكوڕییەكان و باشتر خزمەتكردنی هاووڵاتیان".

رۆژی 20ی 10ـی 2024، دوای شەش ساڵ، هەڵبژاردنی خولی شەشەمی پەرلەمانی كوردستان بەبەشداری 136 لیست و 1191 كاندید بەڕێوەچوو و یەكێتیی نیشتمانیی كوردستانیش توانی 23 كورسی بەدەستبهێنێت.

PUKMEDIA