بڕگەی نەوتی هەرێم لەهەمواری یاسای بودجەدا جێی دەكرێتەوە

PUKMEDIA

ئەنجومەنی نوێنەرانی عيراق، دیناری عيراقی

ئەندامێکی لیژنەی دارایی لەئەنجومەنی نوێنەرانی عیراق رایدەگەیەنێت: "ئەو ماددەیەی كەپەیوەندی بەتێچوی نەوتی هەرێمەوە هەیە دەگاتە ئەنجومەنی نوێنەران و پێویستە لەم مانگەی یاساداناندا دەنگی لەسەر  بدرێت و لەهەمواری یاسای بودجەدا جێی بكرێتەوە".
 
د. نەرمین مەعروف ئەندامی لیژنەی دارایی لەئەنجومەنی نوێنەرانی عیراق بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "بڕیارە لەم هەفتەیەدا هەمواری یاسای بودجە بۆ بڕگەی تایبەت بەنەوتی هەرێم بگاتە ئەنجومەنی نوێنەران و لەسەرەتای هەفتەی داهاتوودا خوێندنەوەی یەكەم و دووەمی بۆ بكرێت".

"لەماوەی ئەم مانگەدا كەوەرزی یاسادانانی ئەنجومەنی نوێنەران درێژكراوەتەوە، لەبڕگەی ماددەی 12 كەپەیوەندی بەنەوتی هەرێمەوە هەیە دەنگی لەسەر  دەدرێت" ئەندامەکەی لیژنەی دارایی وادەڵێت.

لەبارەی بودجەی ساڵی داهاتووشەوە د. نەرمین مەعروف وتی: "چاوەڕواندەكرێت پەسندكردنی بودجەی ساڵی 2025 بكەوێتە ساڵی داهاتوو".

ئەمەش لەكاتێكدایە لەكۆبوونەوەی رۆژی 5-11-2024، ئەنجومەنی وەزیرانی عیراق بەسەرۆكایەتی محەمەد شیاع سودانی سەرۆكوەزیران، بڕیاریدا لەخەرجییە سیادییەكانی حكومەتی هەرێمی كوردستان بۆ تێچووی بەرهەمهێنان و گواستنەوەی نەوت، بەرانبەر ئەو نەوتەی كە لەلایەن هەرێمەوە بەرهەم دێت و لەلایەن كۆمپانیای بەبازاڕكردنی نیشتمانی "سۆمۆ" و وەزارەتی نەوتی فیدراڵەوە وەردەگیرێت بگرێتە ئەستۆ، تێچووەكەش بۆ هەر بەرمیلێك نەوت بە 16 دۆلار دەخەمڵێندرێت.

PUKMEDIA