وردبینی نێوان هەرێم و بەغدا كێشە بۆ مووچەخۆران دروستدەكات

PUKMEDIA

مووچەی فەرمانبەران

به‌پێی زانیارییه‌كانی PUKMEDIA وردبینی لیستی مووچه‌ له‌نێوان وه‌زاره‌تی دارایی هه‌رێم و وه‌زاره‌تی دارایی عیراق كێشه‌ بۆ مووچه‌خۆرانی هه‌رێم دروستكردوه‌و به‌هۆی ئه‌و كێشه‌یه‌وه‌ نه‌توانراوه‌ حكومه‌تی عیراق مووچه‌ی مانگی 10 بۆ هه‌رێم بنێرێت.

سه‌رچاوه‌یه‌ك له‌لیژنه‌ی دارایی ئه‌نجومه‌نی نوێنه‌رانی عیراق كه‌ نه‌یویست ناوی ئاشكرا بكرێت، به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "ئه‌و لیسته‌ی له‌وه‌زاره‌تی دارایی حكومه‌تی هه‌رێمه‌وه‌ بۆ مووچه‌ی مانگی 10 ی فه‌رمانبه‌رانی هه‌رێم ره‌وانه‌ی وه‌زاره‌تی دارایی عیراق كراوه‌، له‌لایه‌ن ته‌یف سامی وه‌زیری دارایی عیراق و چاودێری دارایی عیراقه‌وه‌ پێداچوونه‌وه‌ی بۆ كراوه‌و به‌هۆی هه‌بوونی كێشه‌ تێیدا گه‌ڕ‌ێنرایه‌وه‌ بۆ وه‌زاره‌تی دارایی هه‌رێم".


"له‌وچوارچێوه‌یه‌شدا دووباره‌ وه‌زاره‌تی دارایی هه‌رێم لیستێكی نوێی بۆ وه‌زاره‌تی دارایی عیراق ناردوه‌ته‌وه‌و له‌ئێستاشدا چاودێری دارایی عیراق وردبینی بۆ ئه‌و لیسته‌ نوێیه‌ ده‌كات" ئه‌و سه‌رچاوه‌یه‌ واده‌ڵێت.

به‌پێی زانیارییه‌كانی PUKMEDIA ئه‌گه‌ر لیسته‌ نوێیه‌كه‌ی مووچه‌ كێشه‌ی تری نه‌بێت، دوای وردبینی وه‌زاره‌ت و چاودێری دارایی عیراق له‌لایه‌ن عیراقه‌وه‌ مووچه‌ی مانگی 10ی مووچه‌خۆرانی هه‌رێم ره‌وانه‌ ده‌كرێت.

سه‌رچاوه‌كه‌ی لیژنه‌ی دارایی له‌ئه‌نجومه‌نی نوێنه‌ران راشیگه‌یاند:"هه‌موو مانگێك ئه‌و كێشانه‌ له‌نێوان وه‌زاره‌ته‌كانی دارایی هه‌رێمی و عیراق، دووباره‌ ده‌بێته‌وه‌و ده‌بێته‌ هۆی دواكه‌وتنی ناردنی مووچه‌ بۆ هه‌رێم، بۆیه‌ ده‌بێت دارایی هه‌رێم ئه‌و كێشانه‌ چاره‌سه‌ر بكات كه‌ هه‌موو مانگێك دووباره‌ ده‌بێته‌وه‌".


ئاماژه‌ی به‌وه‌شكرد: "به‌هۆی بوونی كێشه‌ له‌لیستی مووچه‌ی مووچه‌خۆرانی هه‌رێمدا تاوه‌كو ئێستا له‌وه‌زاره‌تی دارایی عیراقه‌وه‌ وردبینی له‌لیسته‌كه‌دا كۆتایی نه‌هاتووه‌و تا وردبینیش ته‌واو نه‌بێت هیچ بڕ‌ه‌ پاره‌یه‌ك بۆ وه‌زاره‌تی دارایی هه‌رێم نانێردرێت".

ئه‌مه‌ش له‌كاتێكدایه‌، به‌شێك له‌ مووچه‌خۆرانی عیراق مووچه‌ی مانگی 11یان وه‌رگرتووه‌، به‌ڵام تائێستا مووچه‌ی مانگی 10ی مووچه‌خۆرانی هه‌رێم له‌لایه‌ن عیراقه‌وه‌ به‌هۆی بوونی كێشه‌ له‌لیستی مووچه‌خۆراندا مووچه‌ی بۆ هه‌رێم نه‌ناردووه‌و وردبینی له‌لیسته‌ نوێیه‌كه‌ی دارایی هه‌رێم به‌رده‌وامه‌.

PUKMEDIA