فراکسیۆنە کوردستانییەکان بایکۆتی دانیشتنی ئەنجومەنی نوێنەرانیان کرد

PUKMEDIA

ئەنجومەنی نوێنەرانی عیراق

بەهۆی لابردنی بڕگەی هەمواری یاسای بودجە فراکسیۆنە کوردستانییەکان ئەنجومەنی نوێنەرانی عیراق بایکۆتی دانیشتنەکەیان کرد و دانیشتنەکە بۆ رۆژی شەممە دواخرا.

د. بڕیار رەشید ئەندامی فراکسیۆنی یەکێتی لە ئەنجومەنی نوێنەرانی عیراق بە ویبسایتی PUKMEDIA ی راگەیاند: "بەهۆی لابردنی بڕگەی هەمواری یاسای بوودجە لە بەرنامەی کاری دانیشتنی ئەمڕۆدا وەک فراکسیۆنە کوردستانییەکان بایکۆتی دانیشتنەکەمان کرد".

"بەهۆی ئەوەی رێژەی یاسایی پەرلەمانتاران لەناو هۆڵی ئەنجومەنی نوێنەراندا نەبوو، دانیشتنەکە هەڵگیرا و بۆ رۆژی شەممە 7-12-2024 دواخرا"، د. بڕیار وای وت.

وابڕیاربوو لە دانیشتنی ئەمڕۆدا ئەنجومەنی نوێنەرانی عیراق خوێندنەوەی دووەم بۆ هەمواری یاسای بودجەی گشتی عیراق بڕگەی ماددەی 12 بکات، كە پەیوەستە بە هەناردەكردنەوەی نەوتی هەرێمی كوردستانەوە، ئەمەش لەكاتێكدایە دوێنی چوار شەممە، 4-12-2024، محەمەد شیاع سودانی سەرۆكوەزیرانی عیراق سەبارەت بە دۆخی سوریاو كاریگەری لەسەر عیراق و هەمواری بەندی تایبەت بە هەناردەی نەوتی هەرێمی كوردستان لە یاسای بودجە چووە ئەنجومەنی نوێنەرانی عیراق و بەشداری دانیشتنێكی داخراوی كرد. 

PUKMEDIA