وتەبێژی یەکێتی: هەواڵی مووچە هەیە و دابەشکردنەکەی دیار نییە

PUKMEDIA

سەعدی ئەحمەد پیرە وتەبێژی یەکێتیی نیشتمانیی کوردستان

وتەبێژی یەکێتیی نیشتمانیی کوردستان سەبارەت بەپێکهێنانی حکومەت و کۆبوونەوەی پەرلەمانی کوردستان رایدەگەیەنێت: :" تاوەکو رێککەوتنی سیاسی لەنێوان لایەنەکاندا نەبێت بۆ هەڵبژاردنی سەرۆکی پەرلەمان، دانیشتنی پەرلەمان بەکراوەیی دەمێنێتەوە،  کە لەوێوە دیاریکردنی پۆستەکانی کابینەی نوێ دەردەچێت ". هەروەک دەڵێت:" یەکێتی هەموو هەوڵێکیداوە بۆ جێبەجێکردنی بڕیارەکانی دادگای فیدراڵی و تەوتینی مووچە، بەداخەوە هەرچەندە پارتی لەکەناڵەکانی خۆیەوە هەواڵی مووچە و گەیشتنی پارە لەوەزارەتی دارایی عیراقەوە بڵاودەکاتەوە، بەڵام تا ئێستا دیارنییە دابەشدەکرێت یاخود نا ئەمەش بێمتمانەیی لای مووچەخۆران دروستکردووە".

یەکێتی دەرگای بۆ لایەنەکان کراوەیە

سەعدی ئەحمەد پیرە وتەبێژی یەکێتیی نیشتمانیی کوردستان بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" تا ئێستا هیچ بەرنامەیەک بۆ کۆبوونەوەی یەکێتیی نیشتمانیی کوردستان و پارتی دیموکراتی کوردستان نییە، بەڵام کۆبوونەوەکانمان بەردەوامە و دەرگامان کراوەیە بۆ هەر لایەنێک کە بیەوێت لەگەڵمان رێکبکەوێت".

" تاوەکو رێککەوتنی سیاسی لەنێوان لایەنەکاندا نەبێت بۆ هەڵبژاردنی سەرۆکی پەرلەمان، دانیشتنی پەرلەمان بەکراوەیی دەمێنێتەوە کە لەوێوە دیاریکردنی پۆستەکانی کابینەی نوێ دەردەچێت، "، سەعدی پیرە وایوت.

تەوتین کێشەی مووچەخۆران چارەسەر دەکات

وتەبێژی یەکێتیی نیشتمانیی کوردستان  ئاماژەی بەوەشکرد:"هەڵمەتی هەڵبژاردنی یەکێتی بریتی بوو لە بەرنامەیەکی تەواوکراو لەڕووی ئابوری و هەلی کار و کۆمەڵایەتی و کێشەی ژنان و کۆچی گەنجان و پرسی ئەمنی و راستکردنەوەی رێڕەوی حکومڕانی، هاوکات خەڵک متمانەی کەمبووە بۆیە دەبێت بەکارەکانی رابردووماندا بچینەوە و رێڕەوی حکومڕانی راست بکەینەوە".

"سەبارەت بەدواکەوتنی مووچەی مووچەخۆران، یەکێتی نیشتمانی کوردستان هەموو هەوڵێکیداوە بۆ جێبەجێکردنی بڕیارەکانی دادگای فیدراڵی و تەوتینی مووچە، بەداخەوە هەرچەندە پارتی لەکەناڵەکانی خۆیەوە هەواڵی مووچە و گەیشتنی پارە لەوەزارەتی دارایی عیراقەوە بڵاودەکاتەوە، بەڵام تا ئێستا دیارنییە دابەشدەکرێت یاخود نا ئەمەش بێمتمانەیی لای مووچەخۆران دروستکردووە، ئەگەر لەئێستایە تەوتین جێبەجێبکرایە ئەوە بارودۆخی مووچە بەوشێوەیە  نەدەبوو، چونکە تا مووچە بەبێ چارەسەر لەدەستی هەرێمدا بێت دابەشناکرێت و بەمشێوەیە دوادەکەوێت"، وتەبێژی یەکێتی وایوت. 

PUKMEDIA