به‌غدا 19 ملیار دینار بۆ جوتیارانی هه‌رێم ده‌نێرێت

PUKMEDIA

گوڵە گەنم

بڕ‌یاره‌ ئه‌مڕ‌ۆ 7-1-2025  بڕ‌ی 19 ملیاری دیكه‌ی پاره‌ی گه‌نمی جوتیاران بگاته‌ هه‌رێمی كوردستان و په‌رله‌مانتارێكیش ده‌ڵێت:"پاره‌كه‌ بۆ جوتیارانی سنووری پارێزگای سلێمانی خه‌رجده‌كرێت".

غه‌ریب ئه‌حمه‌د ئه‌ندامی لیژنه‌ی كشتوكاڵ له‌ئه‌نجومه‌نی نوێنه‌رانی عیراق به‌ وێبسایتی ره‌سمی یه‌كێتیی نیشتمانیی كوردستان  PUKMEDIA ی راگه‌یاند:" ئه‌مڕ‌ۆ بڕ‌ی 19 ملیار دینار پاره‌ی گه‌نمی جوتیاران ده‌گاته‌ پارێزگای سلێمانی و له‌رۆژانی داهاتوودا به‌سه‌ر جوتیاراندا دابه‌شده‌كرێت".

"بۆ پارێزگای سلێمانی 47 ملیارو 642 ملیۆن و 421 هه‌زار دینار ته‌رخانكراوه‌، كه‌ ئه‌مڕۆ له‌و بڕه‌ 19ملیار دیناری ده‌گاته‌ پارێزگاكه‌، هاوكات بۆ پارێزگای هه‌ولێر 44 ملیارو 45 ملیۆن و 43 هه‌زار دینار و بۆ پارێزگای دهۆكیش بڕی 34 ملیار و 165 ملیۆن و 533 هه‌زار دینار ته‌رخانكراوه‌، كه‌ كۆی گشتی پاره‌ی ته‌رخانكراو بۆ هه‌ر سێ پارێزگاكه‌ ده‌گاته‌ 125 ملیارو 852 ملیۆن و 997 هه‌زار دینار" غه‌ریب ئه‌حمه‌د وایوت.

راشیگه‌یاند:" له‌هه‌وڵه‌كانمان به‌رده‌وامده‌بین بۆ مافی برا جوتیاره‌كانمان له‌هه‌رێمی كوردستان و شه‌ڕی به‌ده‌ستهێنانی مافه‌كانیان له‌به‌غدا ده‌كه‌ین".

ئەمەش لەکاتێکدایە، رۆژی 5-1-2025 دەست بەدابەشکردنی چەکی پارەی 188جوتياری هەولێر و ئەو جوتیارانەی كۆیە کرا. 

PUKMEDIA