سەنتەری میترۆ: PUKMEDIA و5 پێگەی دیکە هێرشی ئەلیکترۆنیان کراوەتەسەر

pukmedia

هێرشی ئەلیکترۆنی بۆ سەر PUKMEDIA

بەپێی نوێترین ئاماری ساڵانەی سەنتەری میترۆ بۆ داكۆكیكردن لەمافی رۆژنامەنوسان، هێرشی ئەلیکترۆنی زیادیکردووە و 6 وێبسایت و پەیج بەئامانجگیراون و  یەکیکیان وێبسایتی رەسمی یەکێتیی نیشتمانیی کوردستان PUKMEDIA بووە، بەڕێوەبەری سەنتەرەکەش دەڵێت:" هێرشی ئەلیكترۆنی و توندوتیژی هەردووكیان مەترسیدارن و یەك ئامانجیان هەیە".

دیاری محەمەد بەڕێوەبەری سەنتەری میترۆ بە وێبسایتی رەسمی یەكێتیی نیشتمانیی كوردستان PUKMEDIAی راگەیاند: "ساڵی رابردوو شەش هێرشی ئەلیكترۆنی كراوەتە سەر دەزگاكانی راگەیاندن كە PUKMEDIA، یەكێكە لەو دەزگایانە".

" هێرشی ئەلیكترۆنی ئامرازێكە بۆ ئەوەی لەمپەر بۆ دەزگاكە دروست بكرێت و دەنگی بە خوێنەر و بینەرەكانی نەگات، بۆیە هێرشی ئەلیكترۆنی و توندوتیژی هەردووكیان مەترسیدارن و یەك ئامانجیان هەیە كە رێگری كردنە لە گەیشتنی زانیارییەكان بە رایگشتی"، دیاری محەمەد وایوت.

بەپێی راپۆرتەکەی سەنتەری میترۆ ساڵی 2024 ، شەش هێرشی ئەلیکترۆنی تۆمار کراون، لەکاتێکدا ساڵی 2023 ژمارەکە 4 هێرش بووە.

ئامارەكەی سەنتەری میترۆ لە كاتێكدایە، كە ساڵی 2024 لە كاتی هەڵمەتی هەڵبژاردنی خولی شەشەمی پەرلەمانی كوردستان ،هێرشی ئەلیكترۆنی كرایە سەر وێبسایتی رەسمی یەكێتیی نیشتمانیی كوردستان PUKMEDIA و بۆ ماوەیەك وێبسایتەکە لە كاركەوت و ئاستەنگی بۆ دروستکرا.

بەپێی ئامارەكە سەنتەری میترۆ، ساڵی رابردوو 182 پێشێلكاری دژ بەرۆژنامەنوسان تۆماركراون و لەو ژمارەیەش سێ رۆژنامەنوس بەهۆی هێرشی فڕۆكەی بێفڕۆكەوانەوە گیانیان لەدەستداوە، هەروەها 103 جاریش رێگری لە رۆژنامەنوسان كراوە و شەش هێرشی ئەلیكترۆنی كراوەتەوە سەر دەزگاكانی راگەیاندن، بەمەش پێشێلکارییەکان بە بەراورد بە ساڵی 2023 بەڕێژەی 22% کەمی کردووە، کە لەو ساڵەدا 231 پێشێلکاری تۆمارکراوە.

PUKMEDIA