جێگری سەرۆکی هەرێم لەگەڵ کونسوڵی گشتیی ئەمریکا کۆدەبێتەوە

تایبەت

جێگری سەرۆکی هەرێم و کونسوڵی گشتیی ئەمریکا

 ڕۆژی چوارشەممە ٢٠٢٥/١/٢٢ شێخ جەعفەر شێخ مستەفا جێگری سەرۆکی هەرێمی کوردستان، پێشوازی لە  ستیڤن بیتنەر، کونسوڵی گشتیی ئەمریکا لە هەرێمی کوردستان و وەفدێکی یاوەری کرد.

لە کۆبوونەوەکەدا، په‌يوه‌ندييه‌كانى ئەمریکا له‌گه‌ڵ عێراق و هه‌رێمى كوردستان، دوا پێشهاتەکان و بارودۆخی سیاسیی و ئەمنی ناوچەکە، پڕۆسەی چاکسازیی و رێکخستنەوەی پێشمەرگە، چارەسەرکردنی کێشەکانی نێوان حکومەتی عێراق و هەرێم، باسیان لێوەکرا.

لە کۆبوونەوەکەدا هەردوولا بەردەوامیی و برەودان بە پەیوەندییەکانی نێوان ئەمریکا و هەرێمی کوردستانیان لە هەموو بوارەکاندا بە گرنگزانی، هەروەها هاوڕابوون کە دەبێت کێشەکانی نێوان هەولێر و بەغدا لەسەر بنەمای گفتووگۆ و لێکتێگەیشتن لە چوارچێوەی دەستوور چارەسەر بکرێن، دواتر تیشکیان خستە سەر خێرا پێکهێنانی کابینەی نوێی حکومەتی هەرێم، لەپێناو سەقامگیری دۆخی سیاسی و ئابووریی و فەراهەمکردنی خۆشگوزەرانی بۆ هاوڵاتیان. 

چاکسازییەکانی وەزارەتی پێشمەرگە و خێراکردنی پڕۆسەی یەکخستنەوەی پێشمەرگە، گۆڕانکاریی و پەرەسەندنەکانی سوریا و ڕێککەوتنی ئاگربەست لە نێوان حەماس و ئیسرائیل لە غەززە تەوەرێکی دیکەی گفتووگۆکان بوو.

PUKMEDIA