تەندروستی سلێمانی: مانگرتووان پێدەنێتە قۆناغێكی مەترسیداری تەندروستییەوە

PUKMEDIA

سەردانی بەڕێوەبەری گشتی تەندروستی سلێمانی بۆ خێمەی مانگرتووان

بەڕێوەبەری تەندروستی سلێمانی رایدەگەیەنێت: "مانگرتووان دۆخی تەندروستیان بەرەو خراپتر دەڕوات، چونكە چارەسەری پزیشكی رەتدەكەنەوەو داوایان لێدەكەین بەردەوامبن لەوەرگرتنی چارەسەر".

 ئەمڕۆ 7-2-2025، دكتۆر سەباح هەورامی بەڕێوەبەری گشتی تەندروستی سلێمانی سەردانی خێمەی مانگرتووانی لەسلێمانی كردو لەكۆنگرەیەكی رۆژنامەوانیدا رایگەیاند: "مانگرتووان دۆخی تەندروستیان بەرەو خراپتر دەڕوات و لەمڕۆوە قۆناغێكی تری تەندروستی مانگرتووان دەستپێدەكات كەكێشیان دادەبەزێت و هەموو ئۆرگانەكانی لەشیان روو لە لاواز بوون دەكات، بۆیە داوایانلێدەكەین خزمەتگوزارییە تەندروستییەكان رەتنەكەنەوەو بەردەوامبن لەوەرگرتنی چارەسەری پزیشكی".

راشیگەیاند: "لەڕووی تەندروستییەوە پشتیوانی رەتكردنەوەی چارەسەر لەلایەن مانگرتووانەوە ناكەین و تیمەكانی بەڕێوەبەرایەتی گشتی تەندروستی سلێمانیش كارەكانیان زۆر بەباشی ئەنجامداوە".

دكتۆر سەباح هەورامی ئەوەشی راگەیاند: "لەئێستادا مانگرتووان لەهەموو كەس زیاتر پێویستیان بەچارەسەرەو بۆ بەردەوامبوون لەخەباتەكەشیان پێویستە چارەسەری پێویستی پزیشكی وەربگرن".

وتیشی: "مانگرتووان لەكاتی شكاندنی مانگرتندا دەبێت بەوریایی و لەژێر چاودێری پزیشكدا چارەسەر وەربگرن بۆ ئەوەی زیان بەتەندروستیان نەگات".

رۆژی 25-1-2025،  12 مامۆستاو فەرمانبەر كە سیانیان ژنن، لەبەردەم ئۆفیسی نەتەوە یەكگرتووەكان لەسلێمانی مانگرتنیان لەخواردن و خواردنەوە راگەیاندو بڕیاریاندا تا وەڵامی داواكارییەكانیان نەدرێتەوە مانگرتن نەشكێنن، داواكارییەكانیشیان خۆی لەمووچەو تەوتین و شایستە داراییەكانی مووچەخۆرانی هەرێم-دا دەبینێتەوە.


PUKMEDIA