باڵیۆزخانەی فەڕەنسا: نەخۆشخانەی شار لەباشترین نەخۆشخانەكانی عیراقە

ميدياكان

نەخۆشخانەی شار

وەفدێكی دیپلۆماسی باڵیۆزخانەی فەڕەنسا لەعیراق لەچوارچێوەی سەردانیان بۆ ژمارەیەك لەنەخۆشخانەكانی پارێزگاكانی عیراق و هەرێمی كوردستان، سەردانی نەخۆشخانەی شار-یان لەسلێمانی كردو بەشە جاجیاكانی نەخۆشخانەكەیان بەسەركردەوەو لەنزیكەوە ئاشنابوون بەو خزمەتگوزارییانەی پێشكەشدەكرێن.

وەفدەكەی باڵیۆزخانەی فەڕەنسا سەرسامی خۆیان بەئاستی بەرزی خزمەتگوزارییەكانی نەخۆشخانەی شار نیشانداو ر‌ایانگەیاند: "نەخۆشخانەی شار یەكێكە لە باشترین نەخۆشخانەكان لەسەر ئاستی عیراق و ئەوەی لەم نەخۆشخانەیە بینیویانە لەهیچ نەخۆشخانەیەكی تری عیراق نەبینراوە".

وەفدەكەی باڵیۆزخانەی فەڕەنسا لەعیراق خزمەتگوزارییەكانی نەخۆشخانەی شاریان لەڕ‌ووی پێشوازی نەخۆش و حاڵەتی فریاكەوتن و پێشكەشكردنی خزمەتگوزارییەكانی تر بەزرنرخاند، هەروەها ئەوەشیان خستەڕ‌وو: "جێی خۆشحاڵییە كە نەخۆشخانەی شار سەرباری ئەوەی نەخۆشخانەیەكی فریاكەوتنە، بەڵام خوێندنی دكتۆرای سێ بۆردی كوردستانی و عیراقی و عەرەبی تێدا دەخوێنرێت".
 
هەر لەوبارەیەوە سامان شێخ لەتیف، وتەبێژی بەڕێوەبەرایەتی تەندروستی سلێمانی، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "لەگەڵ ئەوەی لەبواری تەندروستیدا پارێزگای سلێمانی یەكەمی عیراقە، هەوڵەكانیشمان بەردەوامە كەپارێزگاری لەو نازناوە بكەین و سلێمانی وەك پێشەنگ لەكەرتی تەندروستیدا بهێڵینەوە".

"نەخۆشخانەی شار لەگەڵ ئەوەی گەورەترین نەخۆشخانەیە لەسەر ئاستی عیراق، هاوكات لەپێشكەشكردنی خزمەتگوزاری بە نەخۆشان پێشەنگەو بەكوالێتی زۆر باش چارەسەریان پێشكەش دەكات".

PUKMEDIA