سەرۆككۆمار سێ یاساكەی پەسەند كرد

PUKMEDIA

د. لەتیف جەمال رەشید سەرۆككۆماری عیراق

ئەمڕۆ 13ی 2ی 2025 د. لەتیف جەمال رەشید سەرۆككۆماری عیراق یاساکانی لێبوردنی گشتی و گێڕانەوەی موڵك و ماڵ بۆخاوەنە راستەقینەكانیان و باری كەسێتی پەسەند کرد.

پەسەندکردنی یاساکان پاش ئەوە دێت کە دادگای باڵای فیدراڵی  رۆژی 11ی 2 سەرجەم ئەو سكاڵایانەی رەتكردەوە كەلەبارەی راگرتنی یاساكانی لێبوردنی گشتی و گێڕانەوەی موڵك و ماڵ بۆخاوەنە راستەقینەكانیان و باری كەسێتی ئاڕاستەی كرابوو،هەروەها ئەمری وەلائی بۆ هەڵپەساردنی یاساکانیشی هەڵوەشاندەوە.

رۆژی 21ی1ی2025 ئەنجومەنی نوێنەرانی عیراق هەمواری یاسای باری کەسی ژمارە 188ی ساڵی 1959، یاسای گەڕانەوەی ماڵ و موڵکی بۆ خاوەنەکانیان  ، پرۆژە یاسای هەمواری دووەمی لێبوردنی گشتی ژمارە 27ی ساڵی 2016ی پەسەند کرد.

دانیشتنەکەی ئەنجومەنی نوێنەران لەلایەن بەشێک لە پەرلەمانتارانەوە رەخنەی لێگیرا و مەحمود مەشهەدانی سەرۆکی ئەنجومەنەکەیان تۆمەتبار کرد بەوەی پێشێلی میکانیزمەکانی دەنگدانی کردووە، هەروەها دووپاتیان کردەوە کە دەنگدانەکە بەبێ پابەند بوون بە رێکارە رەسمییەکان بەڕێوەچووە،وەک بەرزکردنەوەی دەست، بەهۆی ئەم رەخنانەوە پێنج سکاڵا دژ بە تێپەڕاندنی پرۆژە یاساکان تۆمار کران، دادگای فیدڕاڵیش ئەمری وەلائی بۆ هەڵپەساردنی یاساکان دەکرد،بەڵام 11ی 2 سکاڵاکانی رەتکردەوە و ئەمری وەلائییەکەشی هەڵوەشاندەوە، دواتریش فراکسیۆنی یەکێتی لە ئەنجومەنی نوێنەران سوپاسی دادگاکەی کرد.


 
PUKMEDIA