سوپای عیراق له‌سه‌رگه‌ڕان پێشێلی یاساو بڕیاری دادگای فیدراڵی ده‌كات

PUKMEDIA

گرژی نێوان جوتیارانی كوردو سوپاس عیراق لەناحیەی سەرگەڕان

سوپای عیراق له‌سه‌رگه‌ڕان پێشێلكاری یاسای په‌سه‌ندكراوی ئه‌نجومه‌نی نوێنه‌ران و بڕیاری دادگای فیدراڵی ده‌كات و به‌هێز رێگری له‌جوتیارانی كوردی ناحیه‌ی سه‌رگه‌ڕانی كه‌ركوك ده‌كات كه‌ زه‌وییه‌كانیان بكێڵن و جوتیارانیش پێداگری له‌مافی گه‌ڕانه‌وه‌ی زه‌وییه‌كانیان و كێڵانی ده‌كه‌ن.

ئه‌مڕۆ دوو شه‌ممه‌ 17-2-2025  هێزێكی سوپای عیراق به‌توندوتیژی و دوور له‌به‌هاكان هێرش ده‌كه‌نه‌ سه‌ر جوتیارانی كورد كه‌ زه‌وییه‌كانیان بكێڵن و به‌گوێره‌ی گرته‌یه‌كی ڤیدیۆیی كه‌ بۆ PUKMEDIA نێدراوه‌، ژماره‌یه‌ك پله‌دارو سه‌ربازی سوپا به‌زۆر ملپێچی جوتیارێك له‌سه‌ر تراكتۆره‌كه‌ی راده‌كێشێت كه‌ سه‌رقاڵی كێڵانی زه‌وییه‌كه‌یه‌تی.

ئه‌و جوتیاره‌ی كه‌ له‌سه‌ر تراكتۆره‌كه‌ی هێرشی كرایه‌ سه‌ر ده‌ڵێت: "جگه‌ له‌راكێشانی ملپێچه‌كه‌م، لێیاندام، بۆیه‌ سكاڵای یاسایی له‌سه‌ر ئه‌و هێزه‌ تۆمار ده‌كه‌م".

ئه‌مه‌ش له‌كاتێكدایه‌، رۆژی 21-1-2025، ئه‌نجومه‌نی نوێنه‌رانی عیراق ده‌نگی به‌ هه‌ڵوه‌شاندنه‌وه‌ی بڕ‌یاره‌كانی ئه‌نجومه‌نی سه‌ركردایه‌تی شۆڕ‌شی رژێمی به‌عس دا، كه‌ بۆ كورد گرنگییه‌كی زۆری هه‌یه‌و هه‌زاران دۆنم زه‌وی داگیركراو له‌ ناوچه‌ جێناكۆكه‌كان ده‌گه‌ڕ‌ێندرێنه‌وه‌ بۆ خاوه‌نه‌ ره‌سه‌نه‌كانیان، هاوكات رۆژی 13ی 2ی 2025 د. له‌تیف جه‌مال ره‌شید سه‌رۆككۆماری عیراق یاساكانی لێبوردنی گشتی و گێڕ‌انه‌وه‌ی موڵك و ماڵ بۆخاوه‌نه‌ راسته‌قینه‌كانیان و باری كه‌سێتی په‌سند كرد.

بەڤیدیۆ.. لەناحیەی سەرگەڕان گرژی و ئاڵۆزی كەوتە نێوان سوپای عیراق و جوتیارانی كورد


PUKMEDIA