لەسلێمانی و هەڵەبجەو راپەڕین و گەرمیان خوێندن دەستپێدەکاتەوە

PUKMEDIA

پرۆسەی خوێندن

زیاتر لە ٢ مانگ و نیوە مامۆستایان بەمەبەستی داواکردنی تەوتینی مووچە و وەرگرتنی شایستە داراییەکانیان لەسنوری پارێزگای سلێمانی و هەڵەبجە و هەردوو ئیدارەی سەربەخۆی راپەڕین و گەرمیان، بایکۆتی هۆڵەکانی خوێندنیان کردووە و بەپێی زانیارییەکانی PUKMEDIA بڕیارە لە هەفتەی داهاتووەوە دەست بەخوێندن بکەنەوە، بەڕێوەبەرێکیش لە بەڕێوەبەرایەتی پەروەردەی سلێمانی دەڵێت:" مامۆستایان بەبێ هیچ فشارێک و لەپێناو نەفەوتانی خوێندنی ئەمساڵ بڕیاریانداوە دەست بەخوێندن بکەنەوە" .

مامۆستایانی ناڕازی لەسەرەتای مانگی ١٢ی ساڵی رابردووەوە بەهۆی پێنەدانی مووچەکانیان لەکاتی خۆیدا، بایکۆتی هۆڵەکانی خوێندنیان کرد و تەنها بۆ تاقیکردنەوەکانی وەرزی یەکەم دەرگای خوێندنگەکانیان کردەوە، بەمەش زیاتر لە دوو مانگ و نیو خوێندن راگیرا، بەڵام پۆلەکانی ٩ و ١٢ بەردەوام بوون لەخوێندن.

مامۆستایان بەخواستی خۆیان دەچنەوە هۆڵەکانی خوێندن

بەڕێوەبەرێک لەبەڕێوەبەرایەتی پەروەردەی سلێمانی دەستپێکردنەوەی خوێندنی لەسنوری پارێزگای سلێمانی و هەڵەبجە و ئیدارەکانی راپەڕین و گەرمیان بۆ وێبسایتی رەسمیی یەکێتیی نیشتمانیی کوردستان PUKMEDIA پشتڕاستکردەوە و رایگەیاند:" مامۆستایان بەخواستی خۆیان و وەک ئەرکێکی بەرپرسیارانە بڕیاریانداوە لە هەفتەی داهاتووەوە دەرگای خوێندنگەکان بکەنەوەو دەست بەخوێندن بکەنەوە".

"مامۆستایان بێ هیچ فشارێکی حکومی و حزبی و بەخواستی خۆیان بڕیاریانداوە دەست بەخوێندن بکەنەوە، چونکە لەمانگی ئازاردا ژمارەیەکی زۆر پشووی تێدایە و تەنها مانگی نیسان بۆ خوێندن دەمێنێتەوە، لەکاتێکدا لە مانگی ئایاردا تاقیکردنەوەکانی کۆتایی ساڵ ئەنجام دەدرێن"، بەڕێوەبەرێک لەپەروەردای سلێمانی وایوت.

ئەو بەڕێوەبەرە راشیگەیاند:"وەک چۆن مامۆستایان پێشەنگ بوون لەداواکردنی مافی مووچەخۆران لەئێستاشدا بەوپەڕی لێبوردەییەوە بڕیاریانداوە رێگە نەدەن خوێندنی ئەمساڵی خوێندکاران بفەوتێت".


ئەمەش لەکاتێکدایە، بەشێک مامۆستا و فەرمانبەرانی ناڕازی کە ژمارەیان ١٣ کەس بوو ، بۆ ماوەی ١٥ رۆژ مانگرتنیان لەخواردن و خواردنەوە لەبەردەم بارەگای نەتەوە یەکگرتووەکان لەپارێزگای سلێمانی راگەیاند و خێمەی شکۆیان هەڵدا و دواجار لەڕۆژی ١١-٢-٢٠٢٥ وەک خۆیان وتیان:" لەسەر داوای خەڵک و هاوپیشەکانمان مانگرتنمان شکاند".