بۆ یەكەمجار لەهەرێم سەنتەری نێودەوڵەتی بازرگانی دارایی لەسلێمانی دەكرێتەوە

PUKMEDIA

سلێمانی

بە ئامادەبوونی پارێزگاری بانكی ناوەندی عیراق، سەنتەری نێودەوڵەتی بازرگانی دارایی لەسلێمانی دەكرێتەوەو ئەندامێكی لیژنەی دارایی ئەنجومەنی نوێنەرانیش دەڵێت: "ئەمە یەكەم بازاڕی داراییە لەهەرێم كە رۆڵێكی گرنگ لەكەمكردنەوەی رێژەی بێكاری زیادكردنی سەرمایەگوزاریدا دەگێڕێت".

چاوەڕوان دەكرێت سەنتەری نێودەوڵەتی بازرگانی دارایی لەسلێمانی، لەداهاتوودا ببێتە بۆرسەیەكی گرنگ، چونكە لقی بەشێك لەبانكەكان و كۆمپانیاكانی حەواڵەو ئاڵوگۆڕ لەم بازاڕەدا ئۆفیس دەكەنەوەو هەموو جۆرە مامەڵەیەكی دراوی تیادا ئەنجامدەدرێت.


د. نەرمین مەعروف ئەندامی لیژنەی دارایی ئەنجومەنی نوێنەرانی عیراق، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "ئەمڕۆ پێنج شەممە 20-2-2025، بە ئامادەبوونی عەلی عەلاق پارێزگاری بانكی ناوەندی عیراق، سەنتەری نێودەوڵەتی بازرگانی دارایی لەسلێمانی دەكرێتەوە كە لقی بەشێك لەبانكەكان و كۆمپانیاكانی حەواڵەو ئاڵوگۆڕ لەم بازاڕەدا ئۆفیس دەكەنەوەو هەموو جۆرە مامەڵەیەكی دراوی تیادا ئەنجامدەدرێت هاوشێوەی بازاڕی دراوەكەی سلێمانی".

"ماوەی دوو ساڵە هەوڵی كردنەوەی ئەو سەنتەرە لە سلێمانی دەدرێت، كەوەك بازاڕێكی دراوی پێشكەوتوو وایەو یەكەم بازاڕی داراییە لەهەرێمی كوردستان و دووهەمین بازاڕی داراییشە لەعیراق" د. نەرمین مەعروف وادەڵێت.

راشیگەیاند: "ئامانج لەكردنەوەی سەنتەری نێودەوڵەتی بازرگانی دارایی لەسلێمانی، فراوانكردنی چالاكییە ئابورییەكان و ئاڵوگۆڕی بازرگانی و داراییە لەهەرێمی كوردستان و عیراق و وڵاتانی دراوسێ، چاوەڕوانیش دەكرێت لەداهاتوودا ببێتە بۆرسەیەكی گرنگ و پەیوەندیی دارایی لەگەڵ بازاڕە داراییەكانی وڵاتاندا ببەستێت".

د. نەرمین مەعروف وتیشی: "كردنەوەی سەنتەری نێودەوڵەتی بازرگانی دارایی لەسلێمانی، رۆڵێكی گرنگ دەبینێت لەكەمكردنەوەی رێژەی بێكاری و زیادكردنی سەرمایەگوزاری، چونكە سەرمایەی زیاتر روو لەشارەكە و هەرێمی كوردستان دەكات و هەلی كاری زیاتر دەڕەخسێنێت و رێگا خۆشكەرە بۆ كۆمپانیا جیهانییەكان بێنە سلێمانی و هەرێمی كوردستان و سەرمایەگەزاری لەكەرتە جیاوازەكاندا بكەن".

PUKMEDIA