مووچەخۆرانی هەرێم نزیکەی 70 رۆژە مووچەیەکیان پێدراوە

PUKMEDIA

دراوی عیراقی

زیاتر لەمانگێکە مووچەخۆرانی هەرێم مووچەی مانگی یەک-یان وەرگرتووە و ئەمڕۆ کە ٦-٣-٢٠٢٥، چاوەڕوانی مووچەی مانگی دوو دەکەن و ئەمە جگە لەوەی لەسەرەتای ئەمساڵەوە کە نزیکەی ٧٠ رۆژ دەکات تەنها یەک مووچەیان پێدراوە، ئەندامێکی ئەنجومەنی نوێنەرانی عیراقیش دەڵێت:"دارایی عیراق هەتا ئەمڕۆ وردبینی لیستی مووچەی مانگی شوباتی تەواونەکردووە و ئەمەش هۆکارە بۆ نەناردنی مووچە لەبەغداوە".

کاروان یاروەیس بڕیاردەری فراکسیۆنی یەکێتی لەئەنجومەنی نوێنەرانی عیراق بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" بەپێی ئەو بەدواداچوونانەی ئەمڕۆ لەوەزارەتی دارایی عیراق کردوومە، تائێستا وردبینی لیستی مووچەی مانگی ٢ تەواونەبووە و بەوهۆیەوە دارایی عیراق مووچەی بۆ هەرێم نەناردووە".

"بەهۆکاری ئەوەی لیستی مووچەی مانگی دوو دەبێتە پێوەر بۆ ناردنی مووچەی هەر ١٢ مانگەکەی ئەمساڵ، دارایی عیراق وردبینی زیاتر لەلیستەکەدا دەکات و پێویستیشە ئەو داواکارییانەی هەیانە دارایی هەرێم جێبەجێی بکات"، کاروان یاروەیس وایوت.

کاروان یاروەیس ئاماژەی بەوەشکرد:" چاوەڕواندەکرێت لەسەرەتای هەفتەی داهاتوودا وردبینی لیستی مووچە لەلایەن وەزارەتی دارایی عیراقەوە تەواوبکرێت و دەست بەرێکارەکانی ناردنی مووچە بۆ هەرێم بکرێت، هەرچەندە جارێکی دیکە دارایی عیراق داوایکردووە، کە پەلەبکرێت لەتەوەتینکردنی مووچەخۆرانی هەرێم".

بەپێی زانیارییەکانی PUKMEDIA، بەهۆکاری ئەوەی لیستی مووچەی مانگی شوبات، دەکرێتە پێوەر بۆ مووچەی سەرجەم مانگەکانی ئەمساڵ، هەر کەموکوڕییەکی هەبێت پێویستە دارایی هەرێم چارەسەری بکات، هەرچەندە دابەشکردنی مووچەش دواکەوتووە.

وەزارەتی دارایی هەرێم رۆژی ٥ی٢ی ٢٠٢٥ دەستیکرد بەدابەشکردنی مووچەی مانگی کانونی دووەمی مووچەخۆرانی هەرێم و لەماوەی ٤ رۆژدا مووچەی سەرجەم وەزارەتەکانی دابەشکرد، هەتا ئەمڕۆش کە زیاتر لەمانگێکە مووچەی مانگی شوبات دابەشنەکراوە.

PUKMEDIA