ئەمڕۆ کۆنفرانسی دیداری یەکێتی لەسلێمانییە

PUKMEDIA

دیداری یەکێتی

بڕیارە سەعات ١١:٠٠ی سەرلەبەیانی ئەمڕۆ  ١٩-٣-٢٠٢٥  حەوتەمین کۆنفرانسی دیداری یەکێتی لە تەلاری هونەری شاری سلێمانی بەڕێوەبچێت، ئەندامێکی لیژنەی کۆنفرانس-یش دەڵیت:" لیژنەکان بەپێی پێویستیی و خواستی ئەمڕۆ دیاریکراون".

چرۆ شەهاب ئەندامی لیژنەکانی خوێندنی باڵا و  رۆشنبیری و کلتوری حەوتەمین کۆنفرانسی دیداری یەکێتی بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند : "ئەمڕۆ کۆنفرانسی سلێمانی-چەمچەماڵ لە شاری سلێمانی بەرێوەدەچێت، کە تێیدا چەند لیژنەیەک کە بەپێی پێویستیی و خواستی ئەمڕۆ دیاریکراون و هەر لیژنەیەک لە چەند ئەندامێک پێکهاتوون و پیشنیار و بۆچوونەکانیان لەچوارچێوەی راپۆرتێکدا بۆ دیدار دەخەنەڕوو، پێشنیارەکان کاریگەرییان هەیە لەباشترکردنی رێڕەوی ناو حکومەت و حزب، بەوپێیەش لە داهاتوودا دەتوانین هەنگاوێکی باشتر بنێنن".

" ئاشکرایە لەئێستادا گۆڕانکاری سەردەمیانە هەیە، ئێمەش پێویستە خۆمان لەگەڵ گۆڕانکارییەکان بگونجێنین، نەک گۆڕانکارییەکان لەگەڵ خۆماندا بگونجێنین، بۆیە ئەم دیدارانە کاریگەری هەیە لەسەر چۆنیەتی کارکردنمان و خۆگونجاندنمان لە بواری حوکمڕانی و کاری حزبی"،چرۆ شەهاب وایوت.

 چرۆ شەهاب ئاماژەی بەوەشکرد:" هەر لیژنەیەک راپۆرتی خۆی دەنوسێت و بەرزیدەکاتەوە بۆ لیژنەی باڵای دیدار، کە هەر راپۆرتێک چەندین پێشنیاری تێدایە لە بواری چاکسازی و رێکخستنەوە و گرنگی پێدانی زیاتر بە داهێنانەکان،کە هەموو ئەمانە کاریگەریان دەبێت لەسەر کاروبارەکانی حزب و هاوکات پێکهێنانی حکومەتی داهاتووش، لەگەڵ ئەوەی لیژنەکان زەمینەسازییشیانکردووە کە لەرۆژەکانی داهاتوودا راپۆرتەکان لەلایەن ئەو کەسانەی کەبەشدارن زیاتر دەوڵەمەند بکەن".


کۆنفرانسەکە دوا بەدوای کۆنفرانسەکانی موسڵ ، بادینان، کۆیە، هەوڵێر، گەرمیان- خانەقین و ئینجا شارەزوور دێت، کۆنفرانسەکانی راپەرین و کەرکوک- دووزیش ماون کە بەم زوانە کاتەکەی رادەگەیەنرێت. 

سەرجەم ئەم کۆنفرانسانە لە چوارچێوەی ئامادەکاریدان  بۆ دیدارە گەورەکە بە ئامادەبوونی سەرۆک بافڵ جەلال تاڵەبانی سەرۆکی یەکێتیی نیشتمانیی کوردستان.

بە گوێرەی پەیڕەوی ناوخۆی پەسەندکراوی کۆنگرەی پێنجەم، دیداری یەکێتی چالاکییەکی رەسمیی دەورییە و بەشێکە لە وێستگەکانی خەباتی فراوانی هەڤاڵانە، یەکەم دیداری یەکێتی بەسەرپەرشتی قوباد تاڵەبانی لە بەرواری ١٢-٣-٢٠٢٢ دەستپێکرد و لە٣١-٥-٢٠٢٢ کۆتایی بەکارەکانی هێنا و سیاسەتەکانی یەکێتی لە بوارە جیاجیاکاندا داڕشت و بووە بنەمایەک بۆ سیاسەتی گشتی یەکێتی.

PUKMEDIA