پڕۆژەیاسایەك نزیكەی 50 رۆژ دانیشتنەكانی پەرلەمان رادەگرێت

PUKMEDIA

ئەنجومەنی نوێنەرانی عیراق

سبەینێ ئەنجومەنی نوێنەرانی عیراق لە دانیشتنی ئاسایی خۆیدا حەوت بڕگە تاوتوێ دەكات، كە گرنگترینیان پڕۆژەیاسای دەستەی حەشدی شەعبییە، پەرلەمانتارێكیش دەڵێت: "ئەو پڕۆژەیاسایە لەنێوان فراكسیۆنە عەرەبییەكاندا كێشەی لەسەرەو نزیكەی 50 رۆژە دانیشتنەكانی ئەنجومەنەكەی راگرتووە".

د. بڕیار رەشید ئەندامی ئەنجومەنی نوێنەرانی عیراق لەفراكسیۆنی یەكێتی بەوێبسایتی رەسمی یەكێتیی نیشتمانیی كوردستان  PUKMEDIA ی راگەیاند: "بڕیار وایە رۆژی دووشەممە 24ی 3ی 2025 كۆبوونەوەی ئەنجوومەنی نوێنەرانی عیراق بەڕێوەبچێت و تێیدا پڕۆژەیاسای دەستەی حەشدی شەعبی كەلە 18 ماددە پێكهاتووە، خوێندنەوەی یەكەمی بۆ بكرێت".

"سەبارەت بە پڕۆژەیاساكە، كێشە لەنێوان فراكسیۆنە عەرەبییەكاندا هەیەو هەر ئەوەشە نزیكەی 50 رۆژە دانیشتنەكانی ئەنجومەنەكەی راگرتووە، بەڵام ئێمە وەك فراكسیۆنە كوردستانییەكان بەشێك نین لەو كێشەیە" د.بڕیار رەشید وایوت.

پڕۆژەیاسای دەستەی حەشدی شەعبی، كێشەی لەنێوان سەركردەكانی چوارچێوەی هەماهەنگی دروست كردووە، هەندێكیان لەگەڵ ئەوەدان بەزوویی تێبپەڕێندرێت، هەندێكی دیكەشیان تێبینیان لەسەری هەیە، چونكە بەگوێرەی پڕۆژەكە، 4 هەزار ئەفسەرو فەرماندەی حەشدی شەعبی  خانەنشین دەبن.

PUKMEDIA