توركمانی ناڕازی لەكابینەی نوێدا داوای پۆست دەكەن

PUKMEDIA

عەبدولباست خالید سەرۆكی ئەنجومەنی سیاسی توركمانی ناڕازی

سەرۆكی ئەنجومەنی سیاسی توركمانی ناڕازی داوا دەكات لەكابینەی نوێی حكومەتدا رەچاوەی پێكهاتەی توركمان بكرێت و پۆستی باڵایان پێبدرێت و وەلانەنرێن، داواش لەتوركمانەكانی كەركوك دەكات شەڕی تایفی  وەلابنێن و  خزمەتی نەتەوەكەیان بكەن نەك وەك توركمانەكانی هەولێر هەر یەكەو لەپاڵ حزبێكدا كار بۆ بەرژەوەندییەكانی خۆیان بكەن.

عەبدولباست خالید سەرۆكی ئەنجومەنی سیاسی توركمانی ناڕازی لەلێدوانێكیدا بۆ میدیاكان لەكەركوك رایگەیاند: "داوا دەكەین لەپێكهێنانی كابینەی نوێی حكومەتی هەرێمدا رەچاوەی پێكهاتەی توركمان بكرێت و لەپۆستی سیادی و حكومی و ئەنجومەنی پارێزگاكاندا توركمان رۆڵی گرنگی هەبێت".

راشیگەیاند: "پێویستە نەتەوەی توركمان لەسەرۆكایەتی حكومەت و سەرۆكایەتی هەرێم و سەرۆكایەتی پەرلەماندا پێگەیان هەبێت  و  لەوەزارەتەكاندا پۆستی باڵایان پێبدرێت".

عەبدولباست خالید راشیگەیاند: "لەبری ئەو توركمانانەش قسەدەكەم كە لەپاڵ حزبە سیاسییەكاندان و ناتوانن ئازادانە قسە بكەن، هاوكات خاوەنداری ئەو خەڵكە توركمانانە دەكەم كە بێخاوەنن،  چونكە ناكرێت نەتەوەی توركمان وەلابنرێن".

سەرۆكی ئەنجومەنی سیاسی توركمانی ناڕازی وتیشی: "لەمێژوی پارێزگای كەركوكدا، پارێزگاری وەك د. رێبوار تەها نەبیندراوە، چونكە پارێزگارێكی بوێرەو بێ گوێدانە جیاوازی نەتەوەو پێكهاتەكانی كەركوك خزمەتی سەرجەمیان دەكات، هاوكات مەبەست لە سەردانەكەم بۆ كەركوك هەماهەنگیی كردنە بۆ ئەو توركمانە بەشخوراوانەی ئەم شارەو داوایان لێدەكەم شەڕی تایفی  وەلابنێن بۆ ئەوەی خزمەتی نەتەوەی توركمان بكەن لەكەركوك، نەك وەك توركمانەكانی هەولێر هەر یەكەو لەپاڵ حزبێكدا كار بۆ بەرژەوەندییەكانی خۆیان بكەن".
 

PUKMEDIA