یەكێتی بەپارێزگابوونی هەڵەبجە دەباتەوە ناو ئەنجومەنی نوێنەران

PUKMEDIA

ئەنجومەنی نوێنەرانی عیراق، مۆنیومێنتی شەهیدان لە هەڵەبجە

یەكێتیی نیشتمانیی كوردستان لەسەر ئاستی باڵا هەوڵەكانی بۆ تێپەڕاندنی پڕۆژەیاسای بەپارێزگابوونی هەڵەبجە چڕتر كردووەتەوەو دەیەوێت لە ئەنجومەنی نوێنەرانەوە هەڵەبجە بكاتە 19 هەمین پارێزگای عیراق، ئەندامێكی فراكسیۆنی یەكێتیش دەڵێت: "چاوەڕواندەكرێت لەدانیشتنەكەی ئێوارەی ئەمڕۆدا پڕۆژەیاساكە تێبپەڕێندرێت".


چرۆ حەمەشەریف ئەندامی ئەنجومەنی نوێنەرانی عیراق لەفراكسیۆنی یەكێتی بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "لەگەڵ ئەوەی بڕیاربوو لەدانیشتنی دوێنێی ئەنجومەنی نوێنەراندا دەنگ لەسەر پڕۆژەیاسای بەپارێزگابوونی هەڵەبجە بدرێت، بەڵام بەهۆی تەواونەبوونی رێژەی یاسایی پەرلەمانتاران لەنێو هۆڵی پەرلەمان، دانیشتنەكە بۆ ئێوارەی ئەمڕۆ دواخرا".

"یەكێتیی نیشتمانیی كوردستان لەسەر ئاستی باڵا هەوڵەكانی چڕتر كردووەتەوەو لەگەڵ لایەنەكان لەگفتوگۆدایە بۆ تێپەڕاندنی پڕۆژە یاساكە لەدانیشتنی ئەمڕۆی ئەنجومەنی نوێنەراندا، بۆ ئەوەی هەڵەبجە بكرێتە 19 هەمین پارێزگای عیراق" چرۆ حەمەشەریف وادەڵێت.

لە كارنامەی دانیشتنەكەی ئەمڕۆی ئەنجومەنی نوێنەرانی عیراقدا، پڕۆژەیاسایەكی دیكەی گرنگ هەیە، كەئەویش پڕۆژەیاسای دەستەی حەشدی شەعبییە كە لەلایەن لیژنەی ئاسایش و بەرگرییەوە ئامادە كراوەو چاوەڕواندەكرێت كاریگەری لەسەر زیادبوونی ژمارەی پەرلەمانتاران لەدانیشتنەكەدا هەبێت.

دوێنی سێ شەممە 25-3-2025، دوای دوو جار ئاگاداركردنەوەی پەرلەمانتاران بۆناو هۆڵی پەرلەمان، بەڵام پەرلەمانتاران ئامادەی دانیشتنەكە نەبوون و ئەمەش بووە هۆی ئەوەی دانیشتنەكە بۆ  ئێوارەی ئەمڕۆ دوابخرێت.

PUKMEDIA