ئەمریکا وەفدێکی 101 ئەندامی بۆ عیراق ناردووە

باڵیۆزخانەی ئەمریکا

ئیمزاكردنی یاداشتی لێکتێگەیشتن لەنێوان ژووری بازرگانی ئەمریکاو ژووری بازرگانی عیراق

وەفدێکی 101 ئەندامی ئەمریکی کە نوێنەری 60 کۆمپانیان سەردانی عیراقی کرد، باڵیۆزخانەی ئەمریکاش لە بەغدا ئاشکرایدەکات: "وەفدە ئەمریکییەکە نوێنەری 60 کۆمپانیای بواری کەرتی وزە و تەکنۆلۆژیا و تەندروستيیە ".

"ئەوە یەکەمین کاری بازرگانی وەزارەتی بازرگانی واشنتۆنە لەعیراق و گەورەترین وەفدی بازرگانی ئەمریکيیە  لەمێژووی بازرگانی دا بۆ عیراق" باڵیۆزخانەی ئەمریکا وا دەڵێت.

باڵیۆزخانەی ئەمریکا لە راگەیەندراوێکی رەسمیدا کە ئەمڕۆ دوو شەممە 7-4-2025، بڵاويکردەوە دەڵێت: "وەفدە ئەمریکییەکەش لەگەڵ گەورە بازرگان و لێپرسراوانی باڵادا ژمارەیەک رێککەوتن ئیمزا دەکەن".

دانیال رۆبنستەین سەرۆکی وەفدە بازرگانیيەكە  لە رێورەسمی پێشوازی کردنیان لەعیراق وتی: "ئێمە بۆیەک ئامانج لێرەین، کە پتەوکردنی پەیوەندی بازرگانی بەغدا و واشنتۆنە".

بەپێی زانیارییەکانی باڵیۆزخانەی ئەمریکا لە عیراق کە لە راگەیەنراوەکەیدا ئاشکرایکردووە، ژووری بازرگانی ئەمریکا لەماوەی سەردانەکەیدا کە تا9ی ئەم مانگە دەمێنێتەوە،  یاداشتی لێکتێگەیشتن لەگەڵ یەکێتی ژووری بازرگانی عیراق ئیمزا دەکەن بۆ پتەوکردنی پەیوەندی کەرتی تایبەتی ئەمریکی لەگەڵ هاوتا عیراقیيەکەی.

PUKMEDIA