چه‌ند بڕ‌یارێك له‌به‌رژه‌وه‌ندی مامۆستایان و فه‌رمانبه‌رانی په‌روه‌رده‌ ده‌درێت

PUKMEDIA

دانیشتنی ئەنجومەنی نوێنەرانی عیراق

ئه‌نجومه‌نی نوێنه‌ران ده‌نگی له‌سه‌ر كۆمه‌ڵێك پرۆژه‌ یاسای تایبه‌ت به‌ مامۆستایان و فه‌رمانبه‌رانی په‌روه‌رده‌ی عیراق دا، كه‌ خۆی له‌پێنچ خاڵدا ده‌بینێته‌وه‌و گرنگترینیان زیادكردنی ده‌رماڵه‌یه‌ له‌ 150 هه‌زاره‌وه‌ بۆ 300 هه‌زار.

مه‌حمود مه‌شهه‌دانی سه‌رۆكی ئه‌نجومه‌نی نوێنه‌رانی عیراق رایگه‌یاند:" وه‌ك رێزلێنانێك له‌ هه‌وڵ و ماندووبونی ئه‌و توێژه‌، ئه‌نجومه‌نی نوێنه‌ران كۆمه‌ڵێك بڕ‌یاری له‌به‌رژه‌وه‌ندی مامۆستایان و فه‌رمانبه‌رانی په‌روه‌رده‌ و وانه‌بێژان و گرێبه‌سته‌كان ده‌ركرد كه‌ خۆی له‌م بڕیارانه‌ ده‌بینێته‌وه‌".

1- زیادكردنی ده‌رماڵه‌ی پیشه‌یی بۆ مامۆستایان له‌ 150 هه‌زاره‌وه‌ بۆ 300 هه‌زار.

2- زیادكردنی مادده‌یه‌كی یاسایی بۆ زیادكردنی خزمه‌تگوزاری بۆ دوو ئه‌وه‌نده‌ له‌ناوچه‌ گوندنشینه‌كان به‌ مه‌به‌ستی هاندانی مامۆستایان بۆ كاركردن له‌ ناوچه‌ دووره‌ده‌سته‌كان.

3- دامه‌زراندنی وانه‌بێژ و كارگێڕ‌ به‌ گرێبه‌ستی ساڵی 2020، كه‌ له‌ساڵانی پێشوودا به‌خۆبه‌خش یان گرێبه‌ستی كاتیی كاریانكردووه‌.

4- خه‌رجكردنی مووچه‌ی فه‌رمانبه‌رانی گرێبه‌ستی ساڵی 2024 تا بتوانن ئه‌ركه‌كانیان جێبه‌جێبكه‌ن.

5- پێدانی زه‌وی به‌ سه‌رجه‌م فه‌رمانبه‌رانی په‌روه‌رده‌ هاوشێوه‌ی ئه‌و فه‌رمانبه‌رانه‌ی ده‌ستپێشخه‌رییه‌كانی نیشته‌جێكردنی حكومه‌ت ده‌یانگرێته‌وه‌.

ئه‌مه‌ش له‌كاتێكدایه‌، ئه‌م بڕ‌یارانه‌ به‌شێوه‌یه‌كی به‌رفراوان له‌لایه‌ن به‌ڕێوه‌به‌رایه‌تییه‌كانی په‌روه‌رده‌ی عیراقه‌وه‌ پێشوازییان لێكراو بڕ‌یاره‌ له‌چه‌ند رۆژی داهاتوودا لایه‌نه‌ په‌یوه‌ندیداره‌كان به‌پێی ئه‌و میكانیزم و رێكارانه‌ی كه‌ له‌لایه‌ن وه‌زاره‌ته‌ په‌یوه‌ندیداره‌كانه‌وه‌ راده‌گه‌یه‌نرێن ده‌ست به‌جێبه‌جێكردنی ئه‌و بڕ‌گانه‌ بكرێت.

PUKMEDIA