سەرۆك بافڵ: كابینەی نوێ قەوارەی هەرێم بەهێزتر بكات

نوسینگەی بافڵ جەلال تاڵەبانی، سەرۆكی یەكێتیی نیشتمانیی كوردستان

بافڵ جەلال تاڵەبانی، سەرۆكی یەكێتی، محەمەد شیاع سودانی، سەرۆكوەزیرانی عیراق

بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە محەمەد شیاع سودانی، سەرۆكوەزیرانی عیراق كرد. 

لە دیدارێكدا كە قوباد تاڵەبانی، ئەندامی مەكتەبی سیاسی ئامادەیبوو، گفتوگۆی چڕوپڕ لەسەر دۆسییەكانی تایبەت بە عیراق و ناوچەكە و پەیوەندییەكانی نێوان هەولێر و بەغدا كرا و جەخت لە هەوڵەكان بۆ دوورخستنەوەی عیراق لە كێشمەكێشمەكانی ناوچەكە كرایەوە. 

بافڵ جەلال تاڵەبانی و محەمەد شیاع سودانی جەختیان لەوە كردەوە كە پەیوەندییەكانی نێوان هەرێمی كوردستان و بەغدا بەرەوپێشچوونی بەرچاوی بەخۆیەوە بینیوە و پێویستە هەوڵ بۆ چارەسەركردنی بنەڕەتی كێشەكان لەسەر بنەمای دەستوور و پاراستنی بەرژەوەندیی هاونیشتمانییان بدرێت. 

لە كۆبوونەوەكەدا هەردوولا باسیان لە هەڵبژاردنی ئەنجوومەنی نوێنەرانی عیراق كرد و جەختیان لە بەڕێوەچوونێكی هەڵبژاردنێكی پاك و بێگەرد كردەوە. 

سەرۆك بافڵ هەنگاوەكانی پێكهێنانی كابینەی نوێی حكومەتی هەرێمی كوردستانی روونكردەوە و وتی: "ئامانجمانە كابینەی نوێ داواكاریی هاونیشتمانییان جێبەجێبكات و ببێتە هۆی بەهێزتركردنی قەوارەی هەرێمی كوردستان".

هەر لە كۆبوونەوەكەدا سەرۆكوەزیرانی عیراق رۆڵی یەكێتیی نیشتمانیی كوردستانی لە نزیككردنەوەی لایەنە سیاسییەكانی هەرێمی كوردستان و عیراق بەرزنرخاندو بە رێزەوە باسی لەو هەوڵانە كرد كە لە سەردەمی سەرۆك مام جەلالەوە تاوەكو ئێستا بەردەوامیان هەیە بۆ دروستكردنی یەكڕیزی و هاوهەڵوێستی لە نێوان لایەنەكان.

PUKMEDIA